DI HALIANGI BINTANG #17

MANGARIRIT TU NADAO

Damang dainang nunga matua. Sai malungun mangabing pahompu. Molo adong bintang si gara ni api dao pe taho hatop nama ririton. Unang pe diparedang edangan. Torop do bintang di langit, sigara niapi sada do. Torop pe boru nauli naung huadopi. Namambaen akabukbak taroktokku ima na huririt.

Taon on habagian au tu Semarang, Surabaya dohot Makassar. Program nami sosialisasi Pasar Modal. Hupangido do nean asa tu Medan alai ndang dilean. Tumigon do ninna tu sabola Timur. Asa lam tamba natinanda. Ma tolu bulan au mulak ulak tu Surabaya ala adong pabrik harotas na balga di Sidoardjo naeng Go public manggadis saham. Disima au pajumpang dohot pegawe keuangan na mangurus saham on.

Ala tiap ari hami pajumpang sai mallobok do taroktokku molo masiberengan hami. Molo mulak karejo sian pabrik di Sidoardjo dohot ibana di mobil ni kantor. Au tu hotel Seraton, Surabaya. Ibana tu jabu ni inang bajuna di complex parjabuan Darmo. On ma ulaonku, ala naeng manggadis saham nasida di bursa Jakarta. Si Enny Balo goarna. Ala ingkon hatop do sae administrsina tiap ari ma hami pajumpang.

Jotjot do hami ingkon pajumpang di lapo Dermaga sea food, ndang dao sian complex nasida. Somalna sahat tu natutup lapo i pukul sia. Ala so tahan be au, hudok ma aha nabuni dibagasan rohangku. "Lomo do rohangku tu ho."

Tarsonggot ibaba,"Hurimpu do naung adong nona ni bapak" ninna maila ila dibereng tu toru.

"Ah, unang jou au bapak, jou Abang ma manang bang Leo."

"Olo pak, eh olo bang." Engkel na i songon gulo Sabu. Birong galot. Obukna kariting muse. Matekki.

Huida sian pamerengna, parekkelna adong do rohana tu au. Ala ma diboto karejoku nang singkolahku. Sian i ma olo ibana hutiop tanganna molo mardalan hami. Alai nang sadia leleng adongma naumbotosa najotjot hami pajuppang di lapo i. Disada tingki lao mulak hutiop tangan ni si Enny mijur sian tangga ni lapo on.

"Ise donganmi Enny, marhua hamu sai tuson "

"Hami na manghatai parkarejoan do."

"Parkarejoan ndang di lapo manang di hotel Sheraton."

"Eh unang macam macam hatam. Ise ho huroha!" Buk bak ditinju au. Hutinju muse, hutiop krah ni jakketna. Buk bak ditinju igungku. Madabu au.

"Stop stop, au do na olo," ninna si Enny huhut ditogu au jonjong.

"Barani sada lawan sada." Huangkat tinjukku timbo. Lao halahi.

"Ai ise i Enny?"

"Donganhu doi bang par band sian Sabu."

Hupataru ma ibana tu jabuna. Ma somal hupataru, ma ditanda inangbajuna i au. Dung hundul dohot inangbajunai hudokma hata. "Tante dung Natal au dohot donganhu naeng mardalani tu Bali, boi do dohot si Enny."

Dibereng si Enny na mekkel suping. "Boi boi Leo alai sada syarat. Anggina dohot da?"

Hubereng si Enny, mengkel. "Olo tante, mauliate."

"Ai beasa ndang torus tu Sabu hamu masitandaan dohot natua tua ni si Enny"?

Onma nahupaima. Huririt ma, boa alus nasida. Husungkun si Enny,"Satolop do ho?"

"Abang ma", dibereng inangbajunai.

"Denggan tante ma denggan i."

Maborngin sahat tu hotel. Hu SMS ma si Ferdinand dohot si Chai Lai di Bangkok. Husungkun saut do hamu dohot mardalani tu Bali?. Marsogot nai dibalos si Jojor, "Tahatai majo di Jakarta bang."

Chai Lai ndang sanga ro ninna. Ndang huboto ala hupaboa naeng mangaririt tu huta na dao.
Mulak sian Gareja di Grogol minum ma au dohot si Ferdinanf dohot si Jojor di Dunkin donut di Mal Ciputra.
"Nadijujui inang bajuna do hami masitandaan dohot natoras ni si Enny."

Roma si Jojor manungkun,"Ai ndang mahatophu bang mangaririt, hamu pe tolu bulan dope masitandaan?".

"Humatop dumenggan," ninna si Ferdinand.

"Niida ma annon bea alus nasida."

"Alo do rohangku. Boa dohot ma hita Ferdinand tu Sabu."

"Na denggan molo dohot hamu."

"Tu Sabu ma hita, unang pola tu Bali. Parpudi ma tu Bali"

Hutelponpe si Enny ndang saut tu Bali, tu Sabu nama. Pajumpang di Kupang ma hami tanggal 26. Jolo mar Natal ma. So sabar be au asa hatop mangaririt molo dung di oloi natua tua ni si Enny.

Sahat ma tingkina hami borhat tu Kupang. Ma ditomu tomu si Enny hami di bandara El Tari, Kupang. Paheanna ulos Sabu namarragam keleurna. Rok nai pas apala himpol dibadanna, uli idaon.
"Didia adikmu Enny?"

"Ndang saut dohot ala ndang saut tu Bali."

Ma di booking si Enny karcis tu Sabu marsogot manogot tu hami na opat. Dungi diboan ma hami tu hotel Sasando di Jalan Kartini, Kelapa lima, Kupang. Di hotel ima hami manghata hatai dohot si Enny. Ala ma loja sahat potang di hotel.

Disungku si Jojor ma si Enny, "Ma diboto ho songon dia Abang on?"

"Ma dicaritohon ia ho paribanna dohot calonmu bang Ferdinand. Songoni nang karejo dohot singkolana."

Manogot i habang ma hami 50 menit dohot Susi air, ampuna ni Susi Pujiastuti. Holan ido pesawat na gelleng tu Sabu. Ndang adong pesawat sian Denpasar tu Sabu. Tarida ditoru holan laut. Habang tu Selatan Kabupaten naimbaru SabuRaijua. Goar ni dua pulo na balga di Selatan ni pulo Timor. 
Di bandara Tarmadu ma ditomu - tomu natoras dohot tondong ni si Enny. Masijalangan dohot masiummaan. igung tu igung.
Alang do roha masiummaan. Alai ido adat di Sabu. 

Naeng modom di hotel na gelleng do hami nian. Alai diorai si Enny. Didok annon so siboto adat hami. Hape naeng mambuat roha do hami ro.
Gabe di jabu ma hami modom.Si Jojor dohot si Enny modom di bilut. Au dohot si Ferdinand modom di tonga - tonga di lage. Dung sidung mangan borngin i disungkun amang ima au. "Aha do sangkap haroromu?"

"Beta datang mo minta persetujuan baku sayang ama pung anak, Enny."

Dungi dipeakkon ma napuran dipinggan dijolokku. Huserbeng si Enny dihambirangku. Didokma asa hupangan.
"Molo muta uta au annon bea?"

"Mahubaen tes manis. Ngil ngil ma, inum tes, allang muse, minum muse. Molo so allangonmu ndang oloanna hatam."

Sian pado ndang dilean borunai ba marnapuran ma au. Sude mamereng au siak siakhan. Huhut mengkel. Ipe asa dilean ulos Sabu songon ulos Batak. Anggo si Ferdinand dohot si Jojor sapotan Syal. Dibaen ma goarhu #Mawoke. Astuannya Ma itu laki laki. Mawoke itu burung kecil indah. Ra baen na ganteng i do au.

"Satolop ma hamu mardongan. Alai tabereng ma satonga taon tujoloan on beha do pardonganonmu."

Hugoit ma si Enny huhusiphon, "Leleng mai."

"Dokma mauliate anggo tingki i hita ma i annon."

Nahurimpu hian do laos oloanna pangaririton nami i. Asa hatop binaen pesta. Ditutup ma dohot tangiang. Ipe masiummaan igung ma muse.

Marsogot nai maridi ma hami naopat di aek godang. Ias hian aekna ngali. Tarida angka batu batu nagelleng. Potang ari lao ma gami tu pantai Napae. Uli hian mataniari marrara Gabe huingot kakak ni si Jojor. Margitar ma si Enny mangendehon ende Sabu "Oo nawanni tana ee, li ta bole ballo"
(Hasian unang tadinghon au). Hami natolu mangendehon "Boasa ingkon hutanda hape ingkon marsirang." Jari jari ni si Enny malo hian mangarambas gitar nai. Sanga do ham mardalan di rihit na bontar di topi laut. Alai holan dua do tarida pat di rihiti, ala huompa ibana.

"Ido umbaen cinta mallabab abang Mawoke ate," ninna si Jojor. Margak argak hami sude.

Mulak ma hami natolu. Anggo si Enny tinggal sahat tu taon baru. Tingki borhat tarlambat habang paima Bupati. Sahat tu El Tari Kupang ma borhat Garuda. Tarpaksa ma modom muse di hotel Sasando di Kelapa lima. Husangahon hami ma mardalani di kota Kupang di dolok dolok. Ala ari udan rata rata idaon. Uli hian manatap laut di teluk Kupang. Sahat do hami tu pelabuhan Tenau. Dipinggir dalan maradian hami ala bahat herek di dalan.

Ndang sabar be paimahon piga bulan nai.  Habis ma pulsa tiap ari manelepon bintang Timur sian Sabu i.

DI HALIANGI BINTANG#16

NDANG TARPASIDING

Nunga denggan karejo ni si Jojor. Alai dung mardongan dohot si Ferdinand marungkil ma rohana. Marangan angan gabe PNS, Departemen Keuangan.

Ma leleng si Jojor marsitutu molo adong dirohana. Mulai sian SMA sahat tu masuk Perguruan Tinggi. Tammat pe dapot cum laude 
Diparkarejoan pe tong songoni. Hatop do denggan hundulanna. Lumobi dung pajumpang dohot manager. Ise pe donganna  sude do mangurupi mandapothon hundulan na tumimbo. 
Isarana, si Bonar dongan na parjolo patudu dalan tingki di Jogja. Si Ferdinand, pegawa Pajak na mangurus pajak ni perusahaan. Na mangalean dalan testing pegawai  Departemen Keuangan. 

Ndang tarpasiding si Jojor be si Ferdinand. Olo malobok taroktokna molo masiberengan. Gariada tingki manonton nasida di Jakarta theater di jalan Thamrin, ditopar si Ferdinand do si  Somsak ala ditarik tangan ni si Jojor  mangorahon minum kopi di Starback. Hape nunga tonga borngin. 
Anggo au ndang hea dipasiding. Tuise pe tinodo ni rohana, las rohangku. Asa martamba tondong.

Taringot tu si Somsak ma hupangido tu si Chai Lai asa dilului informasi di kantor pusat PT.CP manang naung adong do tunggane boruna. Unang be sai dijonohi si Jojor.

Ndang marminggu si Jojor sahalion. Hubuka telpon, adong SMS sian si Ferdinand napaboahon opname si Jojor ala demam berdarah. Diopname di Rumah sakit Islam Cempaka Putih. Ala ibana kos di pudi ni Rumah Sakit i. Haluar Gareja ipe au ro. Huida ma disi si Ferdinand. Ibana do dipangido si Jojor pataruhon tu Rumah Sakit. Dohot mangurus administrasi.
Longang au ndang tu au parjolo dipaboa. Hape apartemenhu jonok do, 3 kilometer di Kemayoran. 
Ndang tarpasiding si Jojor be si Ferdinand. Las rohangku, on ma ulaning tinodo ni rohana?

Trombosit ni si Jojor drop tu 65.000. Olo do onom ari opname, ipe asa manaek tu 100.000 manang lobi. Dung ro au tu Rumah sakit ipe mulak si Ferdinand. Disi ma au sahat tu pukul 9 borngin. Hubege maro angka dongan sakantorna. Si Somsak mulak do rap dohot pegawe i.Jala ndang hea ro sahalaksa mandulo. Holan auma dohot si Ferdinand marganti soring.

Las rohangku lam denggan pardonganon nasida. Sai anggiat ma i gabe bintang si gara api. Anggiat ma. Ndang tarpasiding si Jojor be si Ferdinand. Ala jotjot nasida pajumpang, mangurus pajak tu kantor pajak di Plumpang, Semper, Jakarta Utara.

Ala ragu ragu si Jojor disungkun ma tu au dung mulak sian Rumah Sakit. Huboan mangan nasida di Mal Kelapa Gading. "Boado bang naeng dohot au test di Departemen Keuangan?"

"Ho ma mamikkiri. Gajim ma balga. Hundulanmu hatop do manaek. Molo PNS mandasor ma muse."

"Ale tujoloan on denggan do bang. Molo saut hami, gaji nami nadua ma boi mangan."

"Atik naso hodo bintanghu pintor GR doho," ninna si Jojor.

"Jei songonon mai, molo lomo roham PNS satolop do Abang. Molo manuhor saham ma boi hamu rampak sa akun." Mengkel si Ferdinand gogo, dijalang au.

Nangpe marsangkap naeng pindah, hubege do husip husip, ia si Jojor tongdo mangido pangurupion sian si Somsak. Ise do sasintongna amang ni boru ni Chai Lai i. Didiori ma di kantor pusat CP. Dipaboa si Jojor ma tu si Somsak info, bulan piga hami maninggalhon Philadelphia.Dapot ibana do informasi. Ia si Chai Lai marsangkap kawin dohot hamletna dung mulak sian Amerika. Hamlet naonma na mangurus dua jabu nadi sewahon di Chiang Mai. Tu au ndang hea dicaritohon si Chai Lai. Nahuboto ma adong donganna di hutana. 

Ujungna, lulus do test si Jojor masuk PNS di Departemen Keuangan. Tulang, nantulang tung las situtu rohana. Alai ndang hupaboa dope pardonganon ni si Jojor dohot si Ferdinand. Ala binege adong paribanna na mora di huta. Ndang binoto dope topi ni pardonganon nasida annon.

Anggo au ndang tarparsiding si Jojor, ala huetong adekku do. Sian dakdanak hami ma mardongan. Molo pe adong holong, holan  cinta monyet doi.

Ndang sadia leleng mangkuling telpon. "Horas bang."

"Horas, santabi ise do on?"

"Sombong kali Abang ga kenal lagi suaraku."

"Oh si Longga do on, sory da ma leleng ate. Aha kabar di huta?"

"Kabar baik do bang. Diboto Abang do ise  dongan ni si Jojor. Ai sai disungkun inang. Ai bapak ma sai batuk batuhon."

"Rahasia dope da so binoto ise do disolom rohana. Hupaboa pe muse da."

Dipaboa si Jojor ditiopi do ibana unang maradian. Gariada dipanaek hundulanna gabe wakil manager. Tontu tamba ma hepeng tunjangan jabatan. Alai ma hot roha nisi Jojor.

Dungi hupaboa ma, ia sabulan parpudion sai jotjot do au tu Surabaya. Adong pabrik kertas di Sidoarjo naeng go public, manggadis saham di bursa. Adong sada pegawe na mangurus saham i,  mambaen rohangku 

DI HALIANGI BINTANG #15

ULOS BINTANG MARATUR

So dipaboa harorona ma sahat si Chai Lai di Kemayoran. Sian taxi ditelpon au. "Ma dipardalanon hami naeng tu apartmen"

"Boasa ndang dipaboa ho asa hualap tu bandara. Olo hupaima di lobby da"

"Modom di hotel dia sangkapmu?"

"Di hotel manang di son?"

"Molo olo sompit - sompit ba dison." Manaek tu lantai sampulu, pintor diida si Ruthai boneka Gajah. Suman tu boneka na dijabuna di Bangkok. Sungkun sungkun rohangku boasa gabe dos halomoan nami. Dung minum teh kotak na ngali, dipa peak peak di bilut. Dungi hupaboa tu si Jojor naung ro si Chai Lai dohot boruna, Ruthai

Ting tong..."Welcome to Jakarta. On donganhu, Ferdinand". Dipatandahon. Anggo au ma hutanda. 
Ala nunga naeng holom hutelpon ma lapo Tabo Toba, lapo ni MSA, Monang Sianipar Abadi na di Manggarai, Jakarta Selatan. Asa diparade meja nami.Tusima hami mangan, ala adong disi parmusik, parende. Ngali AC na jala pangurupi disan marbaju ulos.

Tingki mangan marende ma angka parende. Dipangido parende, molo adong ende lomo ni roha ni naro.
 "Baen hamu ma amang pargocci ende naeng mangulosi dongan nami hami".

"Beta tu langgatan," ningku tu si Chai Lai dohot si Jojor. Diboan dohot borumai. Hundul nasida di karosi. Tarbege ma ende dohot musik. Huuloshon ma ulos Bintang Namaratur dohot si Jojor tu abara ni Chai Lai dohot boruna i. Huhut manortor. Longang si Chai Lai nang tamu natorop di lapo i. Hujalo mike hupaboa, "Ia Ulos Bintang maratur  on, ulos rahut rahut ni pardongananku tu boru Thailand on." Hudok muse di hata Inggris. "This ulos presented to you as a symbol of our lasting friendship".

Si Jojor dohot hamlet nai si Ferdinand manungkun, "Aha do impola ni mangulosi on?"

"On ma tanda rahut rahut ni pardonganan nami tu joloan on". Alai hurang diantusi nasida do aha sasintongna di bagasan rohangku.

"Thank you so much Leo for warm welcome," (Terima kasih atas penyambutan yang begitu hangat) kata Chai Lai. Borngin i holan na mar nonang - nonang songoni do. 

Alai andorang so modom disungkun. "Ai boasa so kawin dope ho?"

"Molo adong na olo serius anggo boi taon on ma." Mengkel hami.

"Ai si Jojor tu ise do si Ferdinand manang si Somsak?"

"So huboto, anggo boi lului majo  info di Bangkok atik na naung adong do anakna"

Manogoti, dungo au parjolo. Hubaen songon na di Amerika i  Hulompa aek. Hubaen roti dohot susu ni si Ruthai.
"Sawad dee ka. Khob khun ka for coffee." (Selamat pagi. Mauliate kopina).
Uli antong songon goarnai. Ndang marsuri dope ma tarida haulionna.Tingki sarapan sanga dope hami manghatai taringot tu boniaga. Didokma,"Olo do ho investasi manuhor jabu di hutangku?"

"Ndang sai bah hepengku manuhor i. Jolo hu tabung majo."

"Ai dia do da nga master. Molo manuhor jabu ingkon marutang do tu Bank. Aupe mambuat kredit di Bangkok, alai ho mangangsur."

"Ndang boi be au mangangsur, apartmen pe so lunas dope."

"Dua jabukku di Chiang Mai hupasewahon do. Angsuranna sian sewa nai. Jabumi annon aupe pasewahon. Nuaeng ndang maol dapot sewa lewat web site ni Airbnb."

"Anggo songoni parsidohot ma au, homa mangurus ate. Porsea do au tuho."

"Molo manuhor jabu di Chiang Mai olo ma jotjot au tu Thailand," ima di rohangku dibagasan. Alai tahe disi do ibana mangurus i.

Hira hira pukul sia borhat ma hami tu Ancol. Si Jojor dohot si Ferdinand ma paimahon di toru. Holan di komidi putar do au dohot si Chai Lai dohot. Ibana hundul di hoda. Au jonjong hutiop abarana. Si Ruthai, si Jojor dohot Ferdind rampak di hoda di pudi. Manaek halilintar, bianglala na maputor, parau margoyang, istana boneka ndang dohot hami nadua.

Hundul ma hami minum kopi. Disima huorahon ibana asa investasi manuhor saham di Jakarta. Ai hami rap dapot Master di Pasar Modal di Amerika. Mahuboto hami boniaga saham on.

"Saham aha ma naeng tuhoronta?"

"Adong sampulu saham na top. Blue chips goarna. Lima ma nadumenggan, ima ta pillit. Saham BCA, Unilever, BRI, Telkomsel dohot Indofood. Usaha on ma tung leleng di Indonesia. Unang pola mabiar ho."

"Porsea do au tu ho Leo, alai ingot unang simpan telor di sada inganan. Songon prinsip natarparsiajari." Ditiop tangangu.

Molo manuhor saham di Jakarta manang pasewahon jabu di Thailand ndang pola ingkon pajumpang hami. Holan manongos SMS manang e-mail.

Ma lobi pukul dua, ma male si Ruthai. Lao ma hami mangan tu Bandar Jakarta, jonok pintu gerbang haluar. Nangpe nunga pukul dua antri dope. Jolo pilliton do dekke baru di lompa. Hape ma male butuha. Huhut paima masak. Dipaboa si Chai Lai ma, "Tingki dibortian dope si Ruthai on, martangiang au anggiat anakku songon si Leo, ala burju." Diserbeng ibana au.

"O ido hape," ninna si Jojor. Alai songon naso porsea do tarida sian simalolongna. Hucaritohon ma ia haroro ni si Chai Lai nanaeng marboniaga do hami. Investasi manuhor saham dohot  jabu.

"Jei didia ma hamu tinggal," ninna si Ferdinand 

"Totop do. Ndang adong napinda. Holan SMS manang email. Dungi di transfer hepengna."

"Bea ajari ma hami bang manuhor saham," ninna si Jojor.

"Otik otik pe tuhor hamu, dung gajian tuhor hamu sasaotik. Isarana saham ni Bank BRI holan Rp 2.500 do salembar. Tuhor 100 saham (1 lot) holan Rp 2.500.000 do.

"Mom geser," ninna si Ruthai tu mamana. Naeng hundul dilambungku ibana. Mangan pe ingkon au manulangi. Muruk mamakna. 

"Boado Ferdinand dohot ma hita manuhor saham?"

"Olo, alai gabung ma hita ate?"

"Ndang olo au bah, molo gabung. Annon mangalua ho dohot paribanmi, mago hepengki," huhut dipambebeati si Ferdinand. Mengkel hami sude.

Ma pukul lima potang. Mondok ondok si Ruthai. Huompa ma ibana tu mobil gabe si Ferdinand ma mamboan mobil  mulak tu apartmen. Disungkun si Jojor ma si Ruthai di abingangna, "Lomo do roham tu si Leo?"

"Yes aunty I like dad." (Ya tante suka bapak).

"Your dad?"

"No aunty like daddy." Gabe sungkun sungkun rohangku  songon bapakna do  manang bapakna. Umbege i husungun si Ruthai sian pudi, "Suka tante Jojor?"

"Hmm suka dad."

"Ssst call uncle Leo," (Panggil paman Leo) ninna mama na.

"Uncle Leo."

Dung minum, lao muse nasida mar parau na mabaor diboan aek sian inganan na mansai timbo. Husungkun ma ibana, "Ise do donganmu nuaeng?"

"Roma ho tu Bangkok, bereng ma."

Ujungna husungkun ma nanget nanget unang muruk ibana, "Ise do sabotulna amang ni borumi?" Jonjong ibana. Pak...dipastap hurumpu. Tarsonggot au marrara hurumna 

"Unang be hubege sungkun sungkun si songoni."

"Sorry my dear."

Tingki marisap si Ferdinand tu duru, disungkunma si Jojor, "Sorry Jojor, ai beha do pardongananmu dohot si Somsat?"

"Si Somsak i managerhu doi. Ndang huboto molo lomo rohana tu au."

"Boi do  pajumpang dohot si Somsak?"

"Hupasahat pe.!

DI HALIANGI BINTANG #14

BORU NI SI CHAI LAI SUMAN TU SI LEO

Songgot jala las roha ni si Jojor diorahon borhat tu Babgkok. Hape 6 bulan dope karejo. Ala timna do namamaeso, audit pembukuan. Dongan na asing ma hea lao tu ibukota negara Gajah putih i.
Andorang so dipamasuk tu koran, ingkon patorangon do jo tu kantor pusat. Ala naung manggadis saham usaha nasida di bursa BEI Jakarta. Go public didok halak.

Disi dibege barita i pintor dipaboa do tu au. "Bang, dohot do ho tu Bangkok?"

"Marhua ho tusi. Ise donganmu?"

"Diorahon bos presentasi, patoranghon temuan tim audit nami, andoranng so dicetak. Tolu halak hami lao. Direktur, managerhu, au."

"Si Somsak ido kan goar ni manager mi?."

"Boi do au pajumpang dohot hamlet ni Abang mahasiswi na di Philadelpia i ?"

"Ai marhua ho pajumpang tusi."

"Masitandaan, ai didok Abang uli. Alai molo so boi ndang pola. Adong ra rahasia." Gogo engkel na.

"Rahasia aha. Husungkun jo, olo do ibana manang daong, hupaboa pe tu ho."

Dung tolu ari ditelpon ma muse taringot na prersentasi i nasida. Ibana ma padalanton laptop. Si Somsak presentasi. Dipaboa ma tim ni si Jojor do namamareso pembukuan.
"Nabudari ma pajumpang au dohot Chai Lai. Bagak ate bang. Diboan au mangan di restoran Malika antar tu luar kota di jalan Kaset Navamin. Boruna, si Ruthai pe bagak, alai suman tu Abang."

"Bahat hatam. Andigan ho mulak?"

So huboto songon dia pangkataiaion nasida. Alana hata Inggris ni si Jojor biasa biasa do. Untung adong si Somsak boi mar bahasa Melayu. Ibana sorang di propinsi Songkla, parbalokan dohot Malaysia.

"Ari Sabtu diorahon manager au mardalani tu Pattaya. Adong muse na kawin tondongna."

"Wah wah hulala na mambuat roham doi. Sotung disiram Bikhsu ho di pura da."

"Adong do namarbaju mamboan au mardalani tu topi laut. Pegawe cabang disi.

Dicaritohon si Jojor ia managerna i burju, ndang maradian mambuat rohana. Songon modom rupani.  Diorahon do nean modom tu jabu ni tondongna. Alai si Jojor ndang olo. Di hotel do modom. Sian hotel ma nasida lao tu ulaon pesta.
Dipatandahon ma tu tondongna. Mengkel nasida. So huboto nadirimpu do ra hamlet ni si Somsak au.

Diida si Jojor ma songon dia paradaton disan. Si baoa mardalan ditoru ni tolu pintu gaba gaba. Tingki mangalaosi pintu, si baoa marende, manortor, olah raga.. Tingki mangalaosi pintu tolu hali dilean amplop hepeng . Asing dope hepeng tuhor ni boru, barang manang serifikat dibungkus mai dohot abit na rara ipe asa dilean tu parboru. Hurang do sangkanna songon adat Batak
Dohot do si Jojor manambat golang - golang manik - manik di tangan ni pengantin boru boru. Gok ma golang tahe di tangan ni pengantin.Tung so dihilala si Jojor do dibaen mambuat rohana. Ala si Somsak on ma tang umurna.

Borngin nai diorahon ma manonton Cabaret songon na di filem Hollywood. Goarna Alcazar show cabaret di jalan Pattayasaisong road. Disungkun ma au, "Do you like it?" (Lomo do roham?).

"Yes, I like it. But I don't like the girls with minimum dress (Lomo do rohangku. Alai ndang lomo rohangku mamereng pahean ni boru boru). Andorana tarida.
Ido baen lomo roha ni angka turis bule i ro tu pantai Pattaya. Mangida uli uli ni panortor, uli ala dibaen make up na be. Ndang songon  di Bali wisata budaya Bali do digadis.

Mulak manonton cabaret, dipataru ma mulak tu hotel. Diida ma bahat boru boru di Lobby. Angka namasa masaima ra. Na bahat di Bangkok. Dipataru ma tu kamar di lantai 12. Naeng masuk si Somsak. Didok, "Good night. it’s too late." (Selamat malam ma borngin).

Manogot nai dung sarapan, disungkun ma  si Somsak, "Boru ni si Chai Lai bagak. Alai suman tu halak Indonesia ate?". Ndang tabo mandok suman tu si Leo.

"Ai hira sarupa do bohitta dohot halak Myanmar, Laos, Philiippine,"
Dungi disungkun ma molo naeng belanja. Didok si Jojor naeng manuhor golang ni nantulang. Tarbarita do denggan ni ukir - ukiran ni mas Bangkok.
Manaek kareta  Bangkok sky train ma nasida sahat tu Siam square. Mardalan pat ma muse tu MBK (Mah Boon Krong). Disima di lantai dua angka toko mas.

Dituhor ma golang ni nantulang. Lungun rohana, ala on dope boi dibaen las ni roha ni nantulang naung matua. Maradian ma minum kopi di Starbuck. Naso pamotoan dileon si Somsak sada kotak tagelleng. Dibukka, tintin. "I buy you a ring (Saya belikan kau cincin).

"Thank you, but I can't accept it" (Mauliate, alai ndang boi hujalo i). Dipaulak kotak i.

"Please take it." (Jalo ma) ninna sian ias ni rohana.

Ah tahe ndang tabo manulak silean lean ni manager. Marjanji dibagasan rohangna mangganti hepeng nai. Paima jo dipapungu hepeng.

"Oto ma ho paulahonmu. Pasip ma songoni," ningku.

"Ndang tabo bang gabe sipingkiran."

Mulak tu Jakarta. Ari Minggu marminggu ma si Jojor di Gareja nami di Grogol. Sidung marminggu diorahon ma mangan di Mal Ciputra. Diulahi muse hatana. "Ruthai, boru ni Chai Lai suman hian tu Abang."

"Ma hudok bohinta suman do tu halahi. Ndang sarupa dohot Bapakna huroha?"

"Ai so dohot bapakna mangan"

"Ndang disungkun ho didia tunggane dolina?"

"Ndang tabo da manungkun i. Ida ma ni gombarna." Dipakaluar ma tustel saku. Hubereng ma tangkas bohi ni boru ni si Chai Lai.

"Molo anakmu do, tangkas ma dok. Mardosa ho bang."

"Diboto hodo sadia umurna. Taon sadia hami sidung kuliah di Amerika. Sungkun ma annon, bulan naro naeng ro nasida." Sai sip ibana, alai tong do tarida sungkun sungkun rohana.

DI HALIANGI BINTANG #12

MANGABIA

Ala lungun roha ni si Jojor sai jotjot do ditelpon kakakna si Lasma. Molo adong na porlu dicaritohon tu au. Alana sian dakdanak hami jonok do namarpariban i.
"Bang, lungun do ninna roha ni kakak tinggal di asrama dung marujung ngolu ni abang i. Tarlobi di balanjo nasida. Marsangkap naeng mulak nasida tu Samosir."

"Ma denggan i, ingkon move on. Aha ma ulaonna di Samosir?"
"Abang nahinan adong do saba dohot hauma manaom eme dohot jagung. Boima i manambai pensiun naso sadia i."
"Ima Jojor porlu kuliah, ndang pola sai marhoi hoi tu saba tu balian. Alai ala ni holong tingki singkola, songoni ma mulak tu Toba."

Disada tingki roma telpon na mambaen tarsonggot au. "Anggi ni abang i olo do mangabia kakak."
"Ma denggan i, ma hudok tu ho adat do mangabia. Gabe adong ma namarmuduhon si ucok i.""

"Mar karamba dekke muse do ninna."

"Ajari ma Jojor kakak mi asa dibaen usaha na asing, asing ni hauma"
Hucaritohon ma ia pulo Samosir, tujuan wisata do. Usaha wisata bahat. Isarana pasewahon motor, sepeda, motor air.
Denggan do tong pajonjong jabu gabe Penginapan. Dibaen jolo gelleng, 5 kamar. Adong hepeng dipabalga muse. Naporlu ias, adong aek, kipas, WC hundul. Tamue bule Eropa lomo do roha nasida ro tu Samosir. Olo muse leleng tinggal.

Dungi roma telpon ni Amang sian huta, "Boi do ho ro tu pesta ni paribanmu si Lasma?".
"Molo dilean kapala i ijin ro pe au." Si Jojor pe tong do mandok songoni.
"Paboa tu si Bonar molo olo ro dohot si Laxmi. Alai dokma adong pesta Danau Toba. Diingot ho do si Bonar par Balige, kan."
Molo olo si Laxmi dohot asa hupatandahon tu damang dainang. Ditelpon si Laxmi ma au, na olo do dohot manonton Pesta Danau toba. Huhut mandulo  ompung nasida di Balige. Las hian begeon soarana. Si Bonar pe dohot. Amang ido manuhor karcisna.

Sangkapna ari Jumat borhat. Ari Sinen mulak sian bandara Silangit. Jei holan sadari do cuti ala bahat karejo.Tep ma tingkina hupaima ma si Bonar dohot si Laxm di bandara Silangit. Tabo antong minum kopi Lintong na tarbarita, di ekspor tu luat Sileban.Hutuhor muse ombus ombus dongan ni kopi.

Dung pajumpang hami. Hudokma tu si Laxmi,"Marsogot lao hita tu ulaon mangabia si Longga, ipe asa manonton Pesta Danau Toba."
"Tu mantan mi ndang olo au dohot. Naeng manonton Pesta Danau toba dohot tu jabu ni Ompung." Sai huelek elek par hata sada i, alai tong ndang olo.
Jonjong  ibana ditarik tasna. "Beta Bonar tu jabu ni ompung." Ditinggalhon au. Marmobil carteran nasida.

Hudorgukhon kopiku, hugarar. Mallojong au mangalului mobil carteran. "Hatop jo lae, lele mobil na mar keleur na balau i da!"
Sahat di Balige mangisi bensin mobil na i. Hubukka pintu pudi, "Lax, naeng hupatandahon ho tu amang, inang."
Umbege i tor minar  bohina. Didok itona, si Bonar ma,"Lao ma dohot tu ulaon i."
Mijur ma ibana pindah tu mobilhu torus tu Parapat. Anggo si Bonar di jabuna ma ibana modom."Ro ho marsogot Bonar. Ndang pajumpang ho dohot si Jojor?". Mengkel ibana naeng pajumpang dogot  bintang ni pusu pusu nai.

Sahat ma hami di pelabuhan Ajibata paima borhat kapal. Hundul hami di pudi ni kapal mamereng tao toba na tio songon kaca. Hundul dohot angka turis bule. Lambok alogo nangpe las ari, ala so martarup hundulan nami. Margambar ma hami dohot bule disi.
Nibereng ma angka Gareja tagelleng, jabu Batak dohot hotel songon jabu Batak di topi ni tao i. Mansai uli idaon. Ido umbaen ribur ro turis tuson.

Dungi hualap hami ma amang inang tu jabu tondong ni paranak. Huboan hami ma tu kode di topi ni tao toba.
Mataniari potang i lambok margellok gellok di ginjang ni tao sahat tu ujung ni mataniari.
"Uli naiho inang boru aha maho, patut do lomo roha ni anakhi?" huhut disiuk hurum na.

"Ma hea hudok tu inang, hupatandahon pe ise donganhu, boado."

Didok si Laxmi ma margana, "Boa inang lomo do roham au gabe parumaenmu?"

"Hami panolopi do molo dung masioloan hamu."

"Mauliate amang inang," huhut diumma inang.
Dung sae mangan saksang, hupataru mulak amang inang. Anggo hamu modom di Jeck hotel di topi tao. Ditonga borngin i sai hira na goyang nihilala. Ai aha do on narohangku. Hape suara ni galumbang ido sahat tu topi na mar batu batu.

Marsogot nai lao ma hami tu ulaon mangabia i. Hupatandahon ma tu si Longga dohot tunggane doli na. Mengkel do si Longga, alai hansit idaon engkel nai. Songon adong panolsolion.
Pukul opat ma parmisi ma hami mulak tu amang, inang, tulang nantulang.Ndang hujalang hami be si Longga dohot tunggane dolina. Songon na losok roha ni si Laxmi.

Pukul onom ma sahat di pelabuhan Ajibata muse. Lampu lampu, bendera di kapal, di restoran, gaba gaba di gapura sude do dipature. Borngin i di jabu ni si Bonar di Balige ma hami modom. Alai au ndang olo diorahon tu jabu ni ompungna, tulang dohot namboruna. Ai so adong dope hata sahat tu natua tua.

Ari Minggu ma habang mulak sian Siborong borong tu Jakarta asa karejo marsogot. Potang i tu apartmen ma hami. Ala ni lojana peak peak be ma. Au di sofa di ruang tamu. Si Laxmi  di kamar. Tarpodom alai tonga borngin didungoi si Laxmi ma au.
"Boha do bang ma pajumpang dohot amang inang. Huida lomo do roha nasida"

"Ho parmuruk, pangiburu, paheannu pe sai hurang bahan. Maol marsaor dohot tondonghu. Si Lasma dohot tulang pe so disise ho. Hape gabe boruna doho haduan. Na manjalo tintin marakkup. Ingkon paubaon mu do roham."

"Olo do au bang diajari. Diboto ho do omakhu boru Jawa ma leleng lao, so adong mamodai au"

"Huida pe haduan molo muba pangalahom."
Unduk ma bohina lao tu dapur disekka matana. Dibaen ma dua galas es jeruk. Hudilat saotik, tabo ngali tonggi. Alai dung minum pintor mondok ondok, tarpodom au di sofa. Pukul onom dungo. Huida pahean ni si Laxmi marserahan  di sofa.
"Boasa dison bajum marserhan. So hurimpu songoni parangem?"

"Maaf bang."

"Manolsoli ho, saonnari dok maaf sappulu hali."

"Maaf, maaf maaf bang. Maaf  maaf maaf bang. Maaf maaf maaf bang maaf".

"Mulak maho mar taksi tu stasiun. Hita pe putus ma".

"Maaf bang, ai so huboto be mambuat roham."

"Molo dimula ho margabus, margabus ma torus. Sian saonnari ndang hutanda be ho"

DI HALIANGI BINTANG #13

ALAMAN NA IMBARU

Sonang hian roha nisi Jojor ala dapot usaha nanaeng riset manurat  skripsi. Usaha peternakan ayam na balga, ampuna ni halak Thailand, PT.CP. Holan saminggu do riset on. Ipe bahatan di apartemenhu do dikarejoi. Ala au karejo sahat tu pukul 8 - 9 borngin. Holan dua ari do na boi hami marnonang, ari Sabtu Minggu.

Di sada tingki roma telpon tu telpon ni apartemen. "Bisa bicara dengan Leo?". "Telpon HPnya saja, maaf ini siapa?"
"Ini adiknya Laxmi dari  Semarang,"
"Eh, kakak, au do on Jojor."
"Marhua ho disi?"
"Manurat skripsi kak?"
"So diboto ho do adat, ndang diboto ho panghilalanhu".
"Ise ho gabe lomo lomom mangatur. Anggo ho boi modom dison."
"Alai hami ndang macam macam, kan."
"Ha ha ha....ma huboto ise ho." Pintor ditutup, dibanting telpon nai.

Mulak abang sian kantor hupaboa. Pintor ditelpon do tu Semarang. "Ma hudok unang be sai diori au, aha hakmu muruk muruk."
"Maaflah bang."

Sabulan sian i dipangido si Jojor muse data sian PT CP. Data panggadison manuk 10 taon parpudi on. Ala web ni perusahaan maol dapot. Andorang so ditutup telpon na I, dipaboa ma ia dokter Manado i ma mulak rohana. Olo mangain narga. Dipaboa si Bonar.
Ala diboto dokter i na huboan ibana tu Samosir. Mambiar do dokter i hamagoan bintang haholongan nai. Witing tresno jalaran soko kulino (Tubu holong ala di tambur tamburi)
"Unang sai hatai goar ni i tu au, magigi au."
Jei, ma mangalakka alaman naimbaru si Laxmi. Nangpe ndang tammat dope kuliah.

Dang sadia leleng skripsi ni si Jojor nunga dijalo dung dipadenggan dua hali. Holan paima sidang nama. Ndang sadia leleng mangalakka nama si Jojor tu alaman naimbaru.
Dung sabulan sian I, roma telpon sian tulang. "Ma diboto ho naung lulus paribanmi. Cum cum ninna."
"Cum laude tulang. Tutu do na hudok i, pistar hian ibana. Sai hujujui do ibana ringgas marsiajar."
Botul do si Jojor songon bintang SIRIUS. Bintang natumorang sian angka bintang. Paling saotik bintang sian Sibolga. Manang bintang disingkokana, Gama.

"Molo wisuda haduan homa donganna, ate bere. Songon naso tolap be gogokku lao tusan."
"Boi -  boi ma i tuang."
Songoni ma natua tua digogo mancari arian nang botari. Asa boi mangalakka tu alaman naimbaru. Dipatongon do hita tu jampalan na lomak di togu togu tu lambung ni aek (Psalmen 23,2)

Lao ma au tu pabrik di Ancol Barat. Hupaboa ma tu PT.CP ia si Jojor lulus Cum Laude. Jala lomo rohana molo boi karejo disi. Saminggu dope ma dialusi, dijalo gabe staff Akunting. Tingki hupaboa barita na uli on tu si Jojor ima las ni rohana. "Botul do bang hu hu hu…. Mauliate Tuhan." Mangangguk bobar ma ibana. Aupe gabe dohot maraek hurumhu. Huingot loja ni tulang mamarsahit paru paru.

Tingki wisuda ma ditontuhon ingkon marjas do ninna. Roma tingki na leleng dipaima  mahasiswa mar toga. Tingki margambar padua dua. Ibana jonjong dihambirangku.Hutiop gontingna. Tangan hambirangna maniop diploma. Gambar onma diposting gabe gambar profile di Face book.

Roma tingkina  manadinghon tano Jogja inganan naso boi lupa. Hangoluon na porsuk. Dipataru dongan sa koshu. Anggo mbak Sum ma leleng tammat kawin tu letnan Angkatan Udara. Si Bonar dohot donganna dohot do pataruhon.
Maninggalhon alaman ni kampus mangalakka tu alaman naimbaru. Parkarejoan di PT CP Jakarta.
Jakarta...I am coming !

DI HALIANGI BINTANG #11

MANGAIN MARGA

Dung diboto si Laxmi na modom si Jojor di apartmen ni si Leo  mohop ma rohana. Dijou ma itona si Bonar tu Semarang.
"Ai na boha do pardonganmu tu si Jojor. Diboto ho do  modom ibana di jabu ni si Leo?"

"Ai boha do huroha pardonganonmu dohot dokter i gabe muruk ho tu si Jojor ?"

"So huboto ito, sai mangain marga digogohon bapak, ba ma gabe mandao - dao ibana. Bang Leo pe burju do"

Molo tu dokter ido roham ingkon botoonmu do jolo, tu aha mangain marga. Mangain marga ndang songon manuhor nuhor boti. Alai asa hot do adat Batak i, Dalihan Na tolu. Molo ndang mangain marga, mago ma sian paradaton. Molo mangain marga ingkon mamboan sipanganon hita tu si lean marga. Marga ni amanboru. Manang marga ni tulang. Gabe mar pariban ma na sohot.

Didia pe tinggal pintor martondong ma hamu tu Dalihan na tolu i. Ima dongan tubu, boru dohot hula hula. Ima hebat ni marga di halak hita. Molo adong na porlu, sai manghatai do mudar. Lam mura ma sude siulaon. Molo so mangain marga, ba holan marganta ima lungun lungunan. Ujungna pomparan pe mago ma sian tarombo. Ndang sadia pola hepeng tusi. Holan sipanganon dohot ulos do tingki mangadati, papungu tondong Dalihan natolu dohot dongan sahuta. Holan ido. Molo mar marga, tudia pe mangalakka disi adong marga dongan sabutuha, boru dohot hula hula. Asing ni i tondong muse sian anak/boru nadi aen.

"Lao ma ho Lax tu abang, kakakmu di Jakarta. Abangmu  mangain marga do, tu boru Israel, dibaen marga ni tulang. Hope gabe pariban ni doktor i dung sae mangain marga"

"Ala ni ribet naido, umbaen mandao dao ibana."

"Boa do Amangtua bogas ni si Laxmi tu dokter i?"

"Molo so olo mangain marga, sundat pe taho. Alana Manado pe adong do marga dohot adat nasida."

Dipatorang ma ia adat ni Manado asing do sian hita. Anggo hita Patriarchat, mangihuthon Amangna. Asing sian Minang, mangihuthon Inangna. Manado on asing muse. Boi mangihuthon marga ni amangna. Boi mangihuthon marga ni inangna. "Boasa ndang mangalua, mangaadati parpudi?"

"Pamalo malohon do ho, hita naung timbo singkola. mangalua dope nimmu." Ditinggalhon halak i nadua.

Dung lao Amang I, diuduti nasida muse. "Diboto ho do si Jojor modom di apartmen ?"

"So dipaboa tu au. Alai porsea do au, hansit dope roha ni si Leo tu kakak na i, sabar maho."

"Ma sahat didia pangkataion mu, satongkin nai lulus ma si Jojor, tinggal maho."

"Ah, so martopi dope anggo hami. Mamereng disima i."

Ditingki libur koas kuliahna, lao ma si Laxmi tu Jakarta mar kareta api Argo Anggrek. Sahat pukul  lima potang. Turun di stasiun Gambir, sai didiori kakakna na timbo i. Ndang haidaan. Au do dipangido ito Lasma manomu nomu, ala jumonok jabukku, ninna. "Didia kakak ?"

"Ndang sanga ninna."

"Ndang mulak dope Abang tu jabu ate. Maridi majo Abang asa lao hita tu jabu ni kakak."
Hupikkiri boasa ndang martaksi tu jabu ni kakakna i songon si Jojor. Alai tole ma, ala ndang sanga tingki ni ito Lasma, ninna.

Tingki sahat, diangkat si Laxmi tasna sian bagasi. Diboan manaek tu lantai sampulu. Hundul imana di ruang tamu, huhut manguncande di sofa. Sidung maridi au, ma tarpodom ibana. Hudungoi ma asa di kamar modom. Pukul pitu ibana hehe. Hudok maridi majo asa lao tu jabu ni kakakna di Petojo Sabangan.

Si Bonar dipardalanan mulak tu Jogja  maradian di Magelang. Ro telpon sian si Leo. "Horas Bonar aha kabar "?

"Horas, kabar baik do bah."

"Ai diboto ho do naro si Jojor tu Jakarta?"

"Huboto modom di  jabum."

"Aha ma sala ni i, adekku doi."

"Aha huroha na porlu telepononmu au?"

"Ai nung semester piga do ho. Si Jojor ndang leleng be ma wisuda."

"Unang pola hatai naso sihataan, dirim ma urus. Sorry mobil naeng borhat."

"Ise ma olo tu Mahasiswa abadi."

"Tu sadai maho bah"

Sahat tu Jogja borngin i mar Trans Jogja ma si Bonar tu kos ni si Jojor di Petinggen. "Ai aha do dihatai hamu di Jakarta. Songon na asing ho dung modom di jabu ni si Leo."

"Unang bahat hatam. Si Leo tong do abanghu tu ise pe taho saut. Tu si Laxmi, boru Thailand manang isepe."

"Pahatop ma kuliah mi. Tinggal maho di Jogja on. Au ndang sadia leleng lao nama. Lului ma donganmu."

"Hupahatop pe kuliahku hasian. Dang dohot be au begadang, lomba design.

Andorang so borhat tu jabu ito Lasma, dung maridi, di pakke ma baju You can see. Uli ma nean.
"Patut do bah holong roha ni dokter i"

"Hu hu hu Abang ndang hea serius tu au. Hape  ma sai hupaima hatam."

"Huboto do burjum tu au. Huboto do amang pe burju do. Alai, dibagasan roham, dokter ido. Anggo olo dokter i mangaen marga mallojongi ho. Molo sian mulana margabus, margabus ma torus. Sahat tu jabu ni ito Lasma diumma kakakna, dijalang abangna.

"Maraek obukmu, ai dia tasmu."

"Tinggal di jabu ni Abang."

Manghatai ma. Dipatorang si Lasma ma naso olo dokter Manado i diaen marga. Saonnari angka dongan ni si Laxmi ma manjonohi dokter on. Ala bontar antong. Ma dokter muse. Ise naso olo.

Borngin i modom di apartmen do si Laxmi. Ndang ditiopi modom disi. Ido umbaen na heran au, boasa ndang ditiopi asa modom di jabu ni kakakna i. Huhilala na pistaran si Laxmi on mambuat rohangku. Alai sai hubaen do songon ibotokku. Ala dibaen amang i do au sai hira tondong na jonok.
Marganti pahean ma ibana, marsaloar pendek. Tingki marnonang, ndang didok sakkababa taringot tu si Jojor na modom disi. Dibaen si Laxmi ma dua galas es jeruk. Dibuat sada plastik sian sakkuna. Ndang huboto manang aha i.

DI HALIANGI BINTANG #10

MANGIBURU

Mulak sian Amerika manganggur majo. Hulamar ma tu tolu Bank BUMN, Bank Indonesia dohot BAPEPAM, Badan Pengawas Pasar Modal. Naparjolo lulus mawawancara BAPEPAM. Mulai ma karejo, husewa ma apartemen na gelleng. Type studio goarna. Sada do bilutna, ruang tamu huhut dapur. Hutelepon ma donganku si Bonar di Jogja. Alana telpon ni si Jojor ndang boi marsambung. "Horas Bonar, aha do kabarmu. Aha kabar ni paribanki?"

"Horas Leo, andigan mulak sian Amrik. Boasa intor manungkun pariban?"

"Ma mulak au, telpon ni si Jojor ndang boi marsambung ba, na ganti do nomor na?"

"Dion nomorna catat ma. Na adong dope roham tu paribanmi?"

"Sai asing do hatam, adek ku doi, ho do huhaporseai manjaga. Patut ma antong sungkunonku ho. Unang jo mangiburu ho!"

"Unang be arop roham. Maadong hamletna nuaeng."

"Ise?"

"Sungkun ma tu ibana," ndang tabo suarana. Huhut ditutup telponna.

Hutelponma ma si Jojor paboahon baru dijalo au karejo. "Boa do kuliahmu dek?"

"Denggan do bang sataon nai molo so adong abat abat."

"Ma las roha ni Tulang, hatop do ate ndang tarhilala. Alai hubege ma marhamlet ho dohot si Bonar. Unang lola kuliahmu da."

"Mardongan boi do bang asalma unang ganggu kuliah.

"Ise hamletmu, si Bonar manang si kadet dongan ni si mbak Sum?"

"Roma Abang tu Jogja asa hupaboa. Unang pola mangiburu Abang."

"Boasa pola mangiburu ma adong donganhu. Ndang boi dope ro tu Jogja, baru karejo dope".

"Bahat naeng sihataanta."

Tolu ari nai ma ro si Jojor tu Jakarta. Kebetulan libur ari Sinen."Bang ma di Gambir au, lean ma alamat ni jabum"
Ndang sampe sajom ma sahat ibana. Sabtu manogot i ganjangma carito nami barita sian huta, kulia na, dohot kuliah du Amerika. Ujungna didokma, "Nuaeng kakak lungun dope rohana ala parlao ni bang Poltak." Di lap iluna. Hupasombu patorushon hatana. "Kesatuan nasida di BKO mangurupi Polisi di Posso mangalele teroris di tombak." Hulean tissu mangalap igungna. "Asi roha marnida si ucok"

"Didia do ditanom?"

"Di Taman makam Pahlawan, Jalan Sisingamangaraja Medan. Asi roha holan pensiun ni abang ima"

"Molo karejo pe maol do molo  holan ijazah SMA."

"Boha do bang?"

"Boha aha maksudmu?" Ndang maradian na tangis i.

"Maksudhu songon bang. Sip satongkin. "Olo do Abang kawin tu kakak?" Antar mabiar mamereng au.

"Sai naasing do hatam."  Lao au tu kamar asa diboto murukku.

Ringg ringg. Makkuling telpon. "Lao jo au tu toru adong tamu." Satonga jom ma mulak au tu tingkat sampulu. Hupikkirima aha do sidohononku tu si Jojor. "Molo isarana si Longga marujung. Olo  do ho manoroni?"

"Olo ala anaknai anakku doi."

"Molo si Poltak lao ise manghabia. Kan anggina. Adong dope anggina?"

"Adong."

"Ide nise i, idem do ?"

"Huingot Abang holong do tu kakak." Ndang barani mamereng bohingku.

"Anggo ndang dakkana rantingna."  Ale manolsoli rohangku mandok hatangki ala ni murukku.
Borngin i hutelpon ito Lasma, mangorahon mangan  di lapo Pecenongan, Pasar baru. Ala tabo disi, mura muse. Alai ito Lasma mandok di jabuna di Petojo, tumabo marnonang. Tuhoronna ninna panggang karo sian lapo.

Tingki mangan, ito Lasma manungkun," Andigan do Abang kawin?"

"Ndang adong na olo."

"Laxmi ma bang," ninna si Jojor.

"Ssst, ma leleng marhamlet dohot dokter Manado"

"Maju mundur dokter i bang ala sai dijujui Bapak ingkon dibaen margana."

"Ima, ma toho i bang dok ma hatam," ninna si Jojor muse.

"Ndang boi songoni, unang songon si Bonar sai dileon ho roham, alai ndang serius ho."

"Ba na martondong nama hita hape ate," Dijalang tunggane doli ni si Lasma.

"Ndang tahe," ninna si Jojor. Ndang olo manjalang.

Mulak tu apartmen dicaritahon si Jojor ma naso tontu kuliah ni si Bonar. Modom so modom do holan ma main game. Ninna dohot lomba manggambar logo. Olo do dapot dollar sian Australia, Eropa, Amerika. Ninna manambai balanjona. Au ndang olo tu jolma naso tangkas hari depannya.
Andorang so modom didok si Jojor , "Bang lului jo perusahaan naeng riset au mambaen skripsi."

"Usaha aha?"

"Abang ma, alai naung go public, naung manggadis saham di bursa da, atik beha boi karejo disi."

"Mura mai, tenang maho. Bahat disi. Olo do ho usaha peternakan ayam, PT CP nadi Ancol Barat, asa hudok tu donganhu di kantor."

"Abang ma."

Pistar do paribanhon, lulus akuntansi mura do dapot karejo. Ndang songon si Bonar Mahasiswa Abadi i. So binoto andigan tammat. Dungi hucaritohon ma donganhu sa jabu di Amerika.  "Burju hian Jor, onom bulan hami sajabu."

"Burju manang uli?"

"Duansa."

"Sajabu hamu?"

"Asing sungkun – sungkun mu, ai somal do disi, ima ala ni arga ni sewa ni jabu."

"Alai ndang maninggalhon dakdanak, kan?". Mallijong ibana tu kamar. Di hunci pintuna

Mulai borngin i ndang barani be ibana manaringoti kalakna. So adong naumbotosa ma piga hali ma bugang rohangku. Alai disada tingki, disada ari, disada inganan, ingkon madabu do bintang tu ampuanhu. Angka bintang na rumiris so hea modom songon jom. Holan paimahon jom na do, andigan.

DI HALIANGI BINTANG #9

SIMALOLONGNA MENGKEL MARTATA

Lobi onom bulan karejo di Jakata, dipatudu konsultan ma adong kursus di huta ni si Obama. Taringot tu "Tekhnology Informasi untuk manager keuangan". Ala konsultan na mandok, dioloi ma au parsidohot. Hape tung arga do kursus on $ 2.250 opat ari. Ndang dope  uang saku $ 750 sadari.

Hudok ma tu bagian Sekretariat, tuhor ma karcis hu sian Singapur - Washington. Karcishu tu Singapur au pe manuhor. Ndang hupaboa jolo sian Sibolga do au, tu Kuala Namu. Ipe asa tu Singapur.

Lao ma au tu huta. Hudok ma tu Damang Dainang,"Marsangkap au mambuat Master tu Amerika."

"Sadia leleng," ninna Inang

"Sada satonga sahat tu 2 taon."

"Leleng nai puang, mate malungun ma hami annon."

"Anggiat ma dapot naniluluan. Angka dongan pe mambuat master do."

Borhat ma au dohot pesawat United Airline, sian bandara Changi - Dulles airport di Washington DC. Halongangan bolon marnida Ibukota Amerika i. Tarsongon ursa masuk tu huta. Nirimpu do  naung jago Medan i. Maruntung adong saotik hepeng, sataon di pabrik di Palembang. Gajiku poll, hutabung sude. Ala mangan sian dapur pabrik do. Mobil dohot mess rade. Amang martiga tiga gota. Inang marrengge rengge boras dohot pahean. Jei ndang pola manongos au.

Opat ari kursus sian manogot sahat tu potang. Huuduti muse seminar Tehnology informasi. Weekend, ari Jumahat borngin sahat tu Minggu borngin disima tarhilala, huingot sude angka bintang na mintop
Alani i ari Sabtu dohot ma au mar bis City tour di Washington DC. Lao tu makam Kennedy di Arlington, Gedung putih dohot Capitol hill. Lao muse tu taman perang Vietnam dohot  Museum Smithsonian.

Au ndang modom di hotel $ 150 saborngin. Alai di Motel na ura, $ 125 saminggu. Mangan pe hudiori na adong indahan dohot mie, di Chinese food manang di Korean food. Uang makan $ 750 sadari bahat lobi.
Ari Sinen mulai ma hudiori kuliah di tolu kota na jonok. Washington DC, New York dohot Philadelpia. Ujungna hupillit ma Business School, Philadephia University jurusan Pasar Modal .
Roma Email sian kantor manungkun andigan mulak. Alai hupasip. Ro muse Email paduahon mangalean tingki dua Minggu. Ndang hubalos. Patoluhon pe baru  hubalos mandok resign, mudur au.

Saut ma kuliah. Maol do marsaor dohot halak disi. Manghatai cas cis cus hatop. Hulului ma bohi bohi ni halak Asia. Dapot ma tolu halak. Sada  Vietnam, sada Myanmar, sada nai Thailand. Molo hundul di klas dilambungna nsida ma au. Asa boi manungkun. Huboto ma halak Vietnam bahat geng narkoba. Halak Myanmar, amangna jenderal na lari tu Amerika. Songon na sombong. Halahi nadua nunga Warga Amerika. Ia mahasiswi Thailand i, beasiswa sian Bangkok bank, Warga Negara Thailand. Imana hira na sanasip, hata Inggris pe pas pasan.

Ala sa nasib jot jot ma sa meja molo mangan. Molo na asing, manggarar sipanganon na be. Anggo au dohot Chai Lai olo do traktir songon halak hita.
Anggo di cafe kampus sahali mangan boi do $ 5 sahalak. Dompet niba boi dope traktir. Alai molo di restoran ibana ma manggarar. Molo hulean bagianhu sai dipaulak. Bea siswana pasti bahat. Molo ditraktir sai hudok do, "KHOB KHUN KRAB" (Mauliate) hata Thailand. Sonang ibana umbegesa, tarida simalolongna dohot mengkel martata.

Marsiajar di perpustakaan, diskusi, kuliah somal do hami rampak. Alai holan mardongan sambing. Ala ringgas do hami marsiajar naeng hatop dapot master.
Borat do parhepengonhu. Dung onom bulan karejo ma au gabe pelayan di restoran. Borngin ma loja. Molo di musim panas summer, kuliah do hami nadua manambai credit. Asa boi humatop sidung, sampulu ualu bulan. Bahatan na libur do, ala las ni ari manipat.

Dung sataon dobel ma karejoku. Papungu  hepeng manggarar sewa  apartmen. Molo ari Sabtu karejo di panti jompo. Karejona mamboan natua tua di kursi roda manogot tu taman, mangalean ubat sahat tu manjaha buku lao modom. Holan ari Minggu do au mangaso. Upana balga do par jom.

Tingki mulak sian survey di bursa New York ari Rabu. Mambaen laporan ma hami sahat tu tonga borngin di apartmen ni si Chai Lai. "I am back home," (mulak nama au) ningku.

"You stay here." (Dison ma modom). Dilean ma piyama dohot salimut. Di bilut tamu ma au modom.

Sogot manogot i ma dungo au parjolo. Jala hulompa aek. Disi dungo ibana hubaen kopi. "SWA DEEP KRAB." (Selamat pagi) ningku.

"SWA DEEP KA" (selamat pagi) ninna mangalusi. Simalolongna mengkel martata. Tarida haulionna nangpe ndang mar suri.

"Dion kopimu." Hulean cangkirna

"Khop Khun ka"." (Mauliate) ninna.

Ari Kamis i torus hukarejoi hami ala ari Jumat ingkon papunguon. Sidung ma potang. "Huparate atehon asing bohim songon na lungun, boasa?"  ninna dipanotnoti bohiku jonok.

"I am ok."

"You are not ok Leo, tell me." (Ai aha do paboa ma)

"Songonon do Chai Lai. Habis ma sewa ni aparmenku bulan naro. Ndang huboto be."

Sai dipanotnoti simalolongku. "Boasa ndang dison ho tinggal?"

"Betul ndang na margait ho, kan!"

"Mai cha ka." (Daong)

Ala ni las rohangku huhaol ibana gomos hu umma. Tarsonggot. On dope hea huhaol huumma naung sada satonga taon hami mardongan. Hudok tolu hali  Khob khun krap (Mauliate)

Sian tingki i ma lumbang huhilala, ndang karejo be ari Sabtu di panti jompo. Sipata parmisi ndang karejo di restoran mar piga piga ari. Alana sewa apartmen ndang sipikkiron be.
Ala naung sajabu dohot ma au manggarar rekening listrik dohot gas. Hami pe gabe sering curhat.

Ia ibana nunga hea sohot tu halak Perancis. Tingki pemdandu wisata ditingki poso di hutana di Chiang Mai. Parbalohan dohot negara Laos dohot Myamar di Utara.
Hutana Chuang Mai on ngali tarsongon Bandung. Jala bahat turis ro kawin tu halak disi, mangadati. Agen perkawinan dohot bule pe bahat. Alai marsirang ala ni hasomalan. Dungi si Perancis on ndang olo adong anakna. Hape Chai Lai arop situtu rohana mangompa dakdanak.

Au pe hucaritahon ma sude. Jambarhu nasongon layang layang naeng habang tu bintang. Alai marputusan talina. Satonga mate ibana mengkel. Simalolongna dohot mengkel martata. Ma sai naeng huumma nean simallolongnai.

Molo dung sae master didok ibana molo olo au karejo di Bangkok bank di Bangkok. Hudok  "Khon khun krap." (mauliate). Masihol dope tu damang parsinuan dohot dainang pangintubu.

Alai andorang so mulak tu Jakarta diorahon  ma au tu hutana di Chiang Mai. "Alai ndang na lao mawin, kan?"
Dilele ma au dung dapotsa dihaol, "Ai na lomo do.. ?" Hututup pamanganna unang ditorushon sungkun sungkun na i.

Dungi disungkun, "Boasa ndang kawin dope, hape jogi do ho?"

Hucaritohon ma sude. "Ale anggo sahalion, marsitutu nama au, molo dung dapot karejo"

Borngin i rap hundul ma hami di duru mangida angka bintang. Onom bulan hami sajabu tung bahat siingoton. Ponjot ma huhilala manadinghon Kerajaan Gajah putih on. Alai ndang adong hata sitiopon ni si Chai Lai

DI HALIANGI BiNTANG #8

                                                                         

                                                 

MARDAME DAME

Songon na tok ulu manogot on tingki ro surat pindahku tu Anak perusahaan Tehnology Informasi di Jakarta.
Hape sataon dope di bumi Sriwijaya. Pintor hutelepon Sumber Daya Nanusia,"
Aha boncirna au dipindah?" Gogo soarangku.

"Na promosi do bang."

"Toe lului hamu ma panggantikku."

Hape di pabrik lam naek do produksi hubaen. Nangpe au gabe manager keuangan alai ndang apala huboto Tehnology Informasi on.
Saonari mulak mandasor.  Naeng hulamar nean tu Bank. Alai ni dalani majo manang na bea annon.

Pinda tu Ibukota dohot ma au aktif dihuria di Grogol. Masuk Komisi Naposo bulung.  Neang do ulaonna. Isarana mangajar anak jalanan, panitia acara, pengobatan gratis.
Di komisi on adong sada nanaeng pandita, namarbaju. Tammat sian Sekolah Tinggi Widya Wacana Salatiga. Ala 3  pandita nami, ama sude. Dohot 2 naung pangsiun.

Ma leleng ditangiangkon ruas i asa adong inang pandita. Ala  sungka angka ina molo konseling padua dua dohot pandita ama. Goarna do nean calon inang pandita. Alai holan hami naposo do donganna.  Dohot do hang out mangan bubur ayam, mie bakso, minum kopi.
Nang pe songoni tong do sangap hubaen hami.

Angka ina pe ma antri lao konseling Angka rahasia parsaripeon do dihatai disi. Au pe hea do husungkun,"Marnipi au di haliangi bintang na torang. Alai ujungna martabuni  bintang i di pudi ni ombun nasumorop. Aha do lapatan ni i?"

"Nipi i bunga bunga na modom do i Leo. Jonok do bintang i. Ale paima ma tingki ni Tuhan ," huhut didok ayat na.

Ndang dijou au bang manang mas. Ale goarhu do molo padua dua  hami. Ibana pe ndang olo ingkon jouon goarna mbak Triastuti.

Sipata dipangido au pataruhon molo adong partangiangon di wek. Manang marjamita di pos pos. Mulak sian i, diorahon au mangan. Ma tolu hali hami mangan padua dua. Sahali di Hoka hoka Bento di Jalan Sabang, Jakarta. Di AW di Ancol dohot di Pizza Hut jonok ni stasiun Baranangsiang, Bogor. Hea do ibana manggarar. Ala hepeng bulananna himpal. Ai sude do ditanggung huria. Angka dongan sai haduk do pajonok jonokkon boru sian Gombong, Kebumen i. Bahat namarlomo ni roha. Ma burju, birong galot, kariting, sai lambok hatana. Ise naso mallobok taroktokba molo hundul dilambungna.

Alai holan opat bulan do. Tompu mago songon bintang namadabu.Hutelepon kakakna. Gabe au dipodai," Unang be ganggu bang, parmuruk do na tunggane dolina, polisi."
 Sude ruas tarsonggot. Hamagoan ma angka ina nang ruas i. Songoni nang au.

Karejo di Jakarta adong do tabona nean, boi muse mardalani sian Aceh tu Papua digarar kantor. Di bulan pa opathon hubege barita dipukuli  pegawai nami di Palangkaraya ala naeng pajonjong Tower di sada dolok. Umbege hata Palangkaraya on, pintor huingot si Poltak dohot si Longga dipinda tusan dung tammat Secapa. Hupangido ma tu bos asa au ma mangurus i. Ba maruntung dilean.

Dung huida tu dolok, ma adong sada tower disi  Huroha pesaing nami mangido pangurupion tu na marhuaso di luat i, asa diorai hami pajonjongkon tower di dolok i.Jei alani bisnis do hape. Ndang ala ni keamanan.

Lao ma au dohot kapala cabang pak Tuhas Saloh tu Kodam XII Tanjungpura. "Marhua abang sahat tu son?" Songgot rohana.

"Naeng mangido pangurupion do ba." Hupatorang ma sude.

"Lao pe hita bodari tu jabuni Kepala reserse, hutanda doi" Rap lao ma hami dohot pak Tuhas Saloh.

"Perkenalkan abang saya. Kami mau minta tolong bantuan komandan," ninna si Poltak.
Auma muse patorangkon.

"Besok saya suruh mencabut laporannya." Ima didok polisi i.

Roma inanta mamboan tes. Birong galot, obuk kariting. Dung diida au tarsonggot.."Eh, Leonard."
Use ma tes sian tanganna madabu.

Dung disapu inanta i, dijou tu bagasan. Tarbege suara gogo, " Didia ditanda hoi?"
Ndang tarbege be alusni inanta, naso saut pandita nami i.

Sian jabu i ditelpon si Poltak tu jabuna. "Rade ho da asa mangan hita.  Pajumpang ma dohot si Longga dohot si ucok.
"Panggil amangtua ya," ninna tu si ucok. "Rundut nai, molo saut tu si Jojor aha ma jou onna au," ima dibagasan rohangku.

Mangan dekke patin, baung, lais di restoran kampung lauk jonok ni jambartan Kahayan.
Hucaritahon ma galas na mabola di jabu ni calon pandita i. Mengkel martata si Longga. Ah tahe ulini paribanki songon bintang.

Mulak tu hotel Aston lumbang panghilalaan, mardame dohot si Poltak, mardame dohot saingan ni perusahaan. Boi muse pajumpang dohot calon pandita na mago.

DI HALIANGI BINTANG #7

PARIBAN NA PISTAR

Ndang magopo halojaon ni si Jojor na marsiajar, les angka soal test Perguruan Tinggi. Lulus masuk Fakultas Ekonomi dan Bisnis Jurusan Akuntansi GAMA. Nangpe sian huta huta boi do masuk Perguruan Tinggi Negeri.
Sian Sekolah Dasar ndang tarida dope hapistaran ni Jojor. Puntenna holan onom do rata rata. Gariada adong na rara, lima. Manaek tu Sekolah Menengah Pertama dumenggan. Ma umbahat punten pitu. Di Sekolah Menengah Atas ma tarida ma hapistaranna gabe bintang, juara nomor tolu.

Pintor ditelpon Tulang ma au. "Leo ma diboto ho adekmu lulus test. Adong do tingkim pataruhon tu Jogja?"
"Boi mai Tulang., huatur pe tingkikku"
"Hamuma manghatai ate!"
So hea huhalupahon,  Tulang do manjujui au singkola tu Jawa. Anggo Amang naeng martiga tiga gota do sangkapna dung tammat SMA.

Satolop ma  hami humatop borhat huhut mandiori jabu indekos.  Jojor borhat sian bandara F.L.Tobing, Pinangsori. Au sian bandara Sultan Badaruddin II Palembang. Masipaimaan di bandara Cengkareng ma hami.
Dipataru Tulang Nantulang, Amang, Inang si Jojor tu bandara di Pinangsori. Diummai sada sada. Tumatangis ma Nantulang dohot inang paborhattonsa marhuta sada. "Paboa molo dung sahat da inang;" ninna Nantulang huhut disekka simalolongna.
On ma pangarantoan parjolo si Jojor tu Jawa, dao sian huta hatubuan.

Sian Cengkareng mar bus Bandara ma hami tu stasiun Kereta api Gambir. Dungi manaek kereta api Argo Lawu Gambir - Solo. Di Kareta hudok ma tu si Jojor. "Las hian roham huida."
"Olo bang. Tombus angan angan. Adong Abang mangurupi au."
"He he satongkin do Abang. Annon hodo sude."
"Didok bapak Abang do manjaga Au."
"Abang dao do di Palembang. Hupatandahon pe annon tu angka donganhu."

Ala naung loja sogot manogot sian Smaninggir tu bandara Pinangsori, sian na borhat sian Gambir pukul 8.15 ma hohoaman si Jojor."Keretana ngali ias sai hira pesawat ya bang."
"Dang tarhilala annon, dungo manogot ma sahat hita. Jakarta - Jogja 570 kilometer holan 8 jom lobi do. Sai hira Sibolga -  .Medan."

Mulanai hira mondok ondok manuk mamereng saba dohot huta di Bekasi, Karawang. Dungi sande uluna peak di abaranghu sahat tu Cirebon pukul sabolas borngin. Ujungna tarpodom di abinganhu. Au pe tarpodom sahat tu na maradian di Purwokerto  pukul sada manogot. Hudungoi ala manuhor Nasi goreng, kopi, tes sian restoran kereta.Dungi hupatuduhon gambarna di HP tingki modom di abinganhu. "Hutongos ma on tu kakak da!"
"Unang gabe jea annon dibereng inang dohot tulang."

Sahat di stasiun Tugu, Jogja golap dope, pukul opat. Paima mandulo mataniari di peron ma hupaima hami. Mareak tahuak manuk pukul 5 lobi manaek beca hami aso boi maradian sarapan bubur ayam di pinggir dalan Tugu. Tabo jala murah. Sidung sarapan ipe mar taksi tu jabu kos ni mbak Sumiyati.
Ma jolo hutelpon mbak Sumiyati sian Palembang. Adong na kosong sada kamar. Hupillit disi ala holan 5 halak do borua na indekos. Dungi ndang sadia dao tu kampus Bulaksumur. Adong dope nean indekos na asing. Ale dao. Si Jojor ndang adong dope motorna. Adong asrama putri Pringgokusuman inganan ni ito Lasma hian, sian Semarang. Indekoshu najolo tong do dao. Ipe campur borua baoa.

Pukul 7.30 ma sahat hami di kos mbak Sumiyati, dongan koshu najolo. Nuaeng nga pindah tu dalan Monjali Karanjati Petinggen. Ndang pola dao sian kampus. Holan mar opelet satongkin ma sahat. Ala naung dibaen jambatan ndang porlu be marputar dao sian Tugu.

Arian huboan ma tu mess Slamet di Lempuyangan, koshu parpudi. Hupatandahon tu donganhu si Bonar, ito ni si Lasma, par Balige i.
"Homa manjaga Bonar, upasahat ma tu ho. Bereng bereng sasahali. Paribanku do on, unang macam macam huseat ho annon."
"Beres mai Leo unang pola mabiar ho."

"Marsogot boi doho dohot si Bonar tu kampus?"
"Abang ma donganhu, kan potang do kereta api."
Arian i mangan gudeg di warung Bu Yum. Hudok ma tu mbak Sumiyati, "mbak tolong diajari ya. Jangan bergaul dengan sembarangan. Kalau dengan kadet angkatan Udara sih ga pa pa."
"Ga mbak Sum kasihan bapak kalau saya ga bisa sampai wisuda."

Sian ima torus tu stasiun Kereta api. Mabiar habis karcis. Alana sogot manogot ma ingkon mulak tu Palembang.
Borngin i pukul 7.45  tarbege ma boa boa "Kereta Api Taksaka jurusan Gambir segera berangkat." Mbak Sum, si Bonar ma manjalang. Tompu si Jojor manghaol au, marhusip "Unang lupa Abang da," huhut madekdek iluna.Ndang huantusi aha lapatan ni hata na i. Mulai sadari I, sahalakna ma mar huta sada di Jogja. Masuk ma au tu bogasan. Hudada nasida. Lungun rohangku huingot tona ni Tulang asa hujaga paribanhi.

Molo marsiajar dohot dongan sa grup, mar bus Trans Jogja do mura ongkosna.  Sian Jetis tu Malioboro satongkin do. Dungi diuduti muse mar ojek. Dongan donganna sa grup mandok si Jojor pistar do. Jala ringgas kuliah ndang hea absen. Sasaotik  diida Ibana ma pangalaho ni halak Jawa, halak Sunda, Bali dohot na asing. Gabe lam lambok ma panghulingna. Ndang gogo gogo songon na di.huta.

Dung onom bulan ditelpon Tulang au. "Leo si Jojor mangido motor. Alana inganan diskusi mar pinda pinda. Olo tarlambat jala ongkos pe gabe martamba. Boado naroham."
"Nadenggan Tulang molo adong."
Hudokma tu si Jojor asa denggan marsiajar ala ndang na mura mandiori hepeng laho manuhor motor i.

Disada tingki diorahon si Bonar ma si Jojor mardalani tu candi Borobudur. Topet ibotona si Laxmi Bakti sosial disan sian Fakultas Kedokteran Undip Semarang. Di kantor kecamatan Candirejo dibaen operasi bibir sumbing.
"On pariban ni si Leonard do on ito Laxmi. Ma hea hupaboa, kan."
"Olo ma hea martelepon tu Semarang tingki marsahit si Leo."
Onom halak nasida, 3 motor mangida candi na tarbarita i. Ai jonok do sian Jogja, holan tolu pulu kilometer do. Si Bonar sonang hian rohana boi manjonohi si Jojor.

Tingki pakansi semester dielek elek si Bonar ma si Jojor tu Semarang. Tung las roha ni Amang i molo ro halak hita tu jabu.
"Sian dia  hutamu?"
"Sian Sibolga Amanng."
"Hea do par Sibolga ro tuson, dongan ni borungku si Lasma. Goarna si Leonard".
"Leo na di Palembang, paribanhu mai Amang."

Dung modom sude ditelpon si Jojor ma au. "Bang adong tabe sian naeng simatuam sian Semarang."
"Nadiboan si Bonar doho tusi. Manat manat ho tu si da. Itona si Lasma i donganhu hian di Jogja. Alai nunga sohot."
"Huboto do bang, alai si Laxmi do  namangobati Abang, kan. Ha ha ha. Hupasahat pe tabem."

Dung tolu bulan didok mbak Sum, ia edana mbak Endang saut ma tu hamletna kadet Angkatan Udara naung lulus. "Annon hupatandahon pe tu mbak Sri Setyaningsih, hamlet ni si Leo hian.”

DI HALIANGI BINTANG #6

MALALA ROHA

Dung mulak Job training sian Port Klang, Selangor. Dungi dipapinda ma au gabe Wakil manager pabrik Crumb rubber di Palembang. Ala manuhor masin na imbaru sian Guthrie Sdn Bhd. Naeng ekspor gota nama sude.
Pabrikna di topi Sungai Musi dibariba ni kota Palembang. Mar speed boat do lao karejo.

Ala bahat karejo sipata modom di fabrik. Alai molo ma malam Minggu, disima tarhikala, malala roha dibagasan. Tu ise ma iba mangalu alu.
Dohot ma au koor ama ala so adong koor Nnaposo bulung. Hundul nami dihambirang, boi mangida ruas i. Ma sabulan huparate atehon sada ina dohot boruna. Molo mulak sai masitiopan huhut mengkel.
Bahat do nean namarbaju na uli, alai adong mai na menor bohina, pahean na hurang bahan manang na mok mok, mar baju na arga.

Di bulan patoluhon ndang tahan be au. Hubaranihon ma manise dung haruar Gareja. “Horas inang, Leo," hupaboa margaku huhut hujalang nasida na dua. "Eva," ninna boru na i. Maila ila itoan i dibereng tu toru. Pahean na naimbaru, ale na mura mura i do bahan na.
“Boi do hupataru?"
Diserbeng borunai mama na. Di undukhon mama na. Si Eva ma di jolo, mama na di pudi.Somalna mardalan pat do nasida sahat tu sirpang tolu. Sian ipe mar opelet. Hupataru sahat tu simpang dalan 10 ilir Timur. Mardalan pat muse tu bagasan. Hu parkir jeep ni kantor i di topi dalan. Ia bapakna nunga jumolo. Adong dope sada anggina baoa.

Mulai sian i ma ringgas rohangku ro tu jabuna. Tarlobi molo malam Minggu. Asing sian i molo adong undangan sai huboan ma. Molo di complex Pertamina Plaju, jot jot do di pesta ulang tahun dibaen dangsa. Ala bajar dope, molo ende na slow ipe hami mardansa. Hutiop tanganna, gontingna manang tanganna diabarangku. Sipata tonga borngin ipe asa mulak.

Heado di ari udan, ari Minggu lao hami nadua mar speed boat ni perusahaan. Hape banjir do da, bahat hau mabaor. Ndang mabiar hami.
Tangan hambirangku ma maniop gas ni speed boat on. Tangan siamun maniop obukna na diombus alogo hona matakku. Hubereng tu siamun, dibereng tu hambirang. Las hosana. Hupalua ma gas na i. Ah, angur hian obukna.

Ala naung lam jonok hami, bahatma namar husip. Tarlobi di angka ina na adong boruna, "Ai boasa si Eva boru ni si adui?". Adong muse mandok, "Bahat boru ni par Petamina boasa si Eva?". Hupeop dibagasan rohangku. Tole ma na mangiburu be doi. Bangkona mangiburu, ma denggan karejo, mar mobil muse.
Alai piga halak inanta ni koor ama mandok hata naso denggan taringot tubamang ni si Eva nahinan. Las pinggol umbegesa.

Ala bahat karejo manuhor gota tu tokke kaupoik di huta huta. Sahat tu parade gota naeng export tu Hamburg, Jerman dohot Milano di Italy. Jei so boi dope nitakkohon tingki mulak tu huta. Ujungna, damang dainang ma ro tu Palembang. Huhilala ndang holan alani sihol. Ndang huboto aha sihataan baen na ro mar bus sadari saborngin.

Di borngin i dung mulak karejo dicaritohon ma sude aha namasa di huta. Alai lao modom, batuk batuk ma inang. "Songonon do Amang haroro nami. Boa roham molo si Jojor tapasaut?"
Songon na hona listrik tarsonggot au. Alai hutahan ate atekku. Ma loja nasida ro. Laos so diboto nasida do, bugang nadi rohangkon.

Hualusi,"Ai didok si Jojor ma satolop Tulang naeng kuliah tu Jogja. Aupe satolop do asa lam maju pomparan ni ompung."
"Hami ma matua ma naeng mangabing pahompu," ninna Amang. "Manang naung adong do hamletmu?," ninna Inang muse.
Sai sip au. Si Laxmi naso hea susa ngoluna, parangena, paheanna na hurang abit. Songoni nang si Eva bahat husip husip binege. Ujungna hualusi,"Ndang adong."

Holan tolu ari do mulak bangging damang dainang. Alai siholhu pe ma tarubati haroro nasida.
Ma lobi 5 bulan au mardongan dohot si Eva, husip husip ndang mago. Gariada lam tangkas. Ia ompung ni si Eva, ruas ni partai Palu arit. Amangna pe tong simpatisan. Boasa sai hataan namasa najolo, si Eva pe  so tubu dope. Ima tahe late mangida halak sonang.

Di malam Minggu mangan ma hami di parau terapung Cek Merry, di topi sungai Musi. Boi mamereng hinauli ni lampu Jembatan Ampera. Dohot parau ketek na mondar mandir disi. Huallang hami ma Empek empek Kapal selam, ketan Sarikayo dohot martabak.

Andorang so mulak, husungkun ma nanget nanget, "Sorry ya Eva, botul do ompung...?"
Pintor dipotong hatakki,"Tutu doi bang," huhut maraburan iluna.
Gabe sip nama au ndang huboto me mandok agia aha. Tong lungun rohangku mamikkiri parsorion nasida saripe.

Tingki manaek tu mobil ma gale gale huhut tumatangis. Hulean sapu tanganhu. "Tolema Eva lupahon ma sungun sungkun hi."
"Hu hu hu, naeng putus do Abang?".
Tarsonggot au ndang hurippu dohononna songoni.Diboto do na dibagasan rohangku. Malala roha, marsalaon ate ate ni si Eva. So mardosa boasa imana na hona?. Maraprap naso magulang.

Tingki turun sian mobil, mardalan nangkok dalan tu jabuna. Hu tiop gontingna, ditiop abarangku. Gale gale mardalan. Dibuka mamana pintu,"Mahua ho Eva, mahua ho inang?"
"Masuk angin inang nangkin di sungai Musi;" ningku margabus. Huboan tu bilutna, dibaen inang miak angin didampoli. Hupaima sahat tu natarpodom. Hu umma huruma, ipe asa mulak au, cinta pertamana. Ima umma ummaku parpudi. Dungi ndang hea be hudege jabu i.

Au pe maniak ate atekku mamikkiri.  Aupe jungkat, pulut rohangku manadingkonsa. Lam maniak are ate ni si boru adi. Piga hali ditelpon si Eva ndang huangkat. Di SMS, “Bang boasa so ro be ho?".
"Sorry Eva bahat karejoku, di pabrik do au modom"

Ala arsak ni rohangku, adong ari libur kejepit, ari Kamis borngin mulak au tu huta tu Sibolga. Ari Jumat ma sahat tu Sibolga marbus Bintang Utara.
Arian i digule inanga ma dekke aso aso dohot sayur garikkau nadi gule. Pas tingki mangan ro si Jojor. Somal doi molo hatop mulak singkola, maradian di jabu nami andorang so nangkok tu dolok tu Simaninggir. Tarsonggot, "Naro do Abang," laos dibuat piringna, hundul di lage di hambiranghu.

Dung mangan diorahon ma au topi laut tu Pandan, ibu kota ni Tapanuli Tengah. Hundul hami di bona ni harambir naung peak diginjang ni rihit na bontar.
Dicaritahon ma taringot ni kakakna naung denggan pamatangna, 5 bulan. Abangna nuaeng pendidikan Secapa di Kodam I Bukit Barisan di Jl.Gatot Subroto, Medan.
"Alai bapak dohot inang ndang diebati dope tu Samosir. Ndang malum dope rohana."
"Molo sae pendidikan Abang dan kakak naeng mamboan sipanganon do tu Simaninggir. Si ucok ma boi diboan."

"Hope unang jo marhamlet da. Didok ho ingkon saut S1."
"Amang boru dohot namboru ro tu Palembang. Adong do huroha na porlu?"
"Rahasia nami mai,"

Dilelei ma au di topi laut, di ihit na bontar i. Madabu ibana, maraek baju seragamna.