ITO SIAN SEMARANG
"Ah ndaong bah," ningku mangalusi. Ale huhilala songon na lam longgar saloarhu.
Asa boi marhosa, unang sai ni ingot, pindah ma koshu tu Wisma Slamet di Lempuyangan. Jonok tu stasiun Kereta Api. Boasa so marsak, ala Paribanhu sai songon api do. Jonok mohop. Ia dao ngali ngali. Dungi muse bintang di Kauman, ma diombus alogo tu topi laut Semarang.
Di Mess on adong donganhu par Balige margoar si Bonar. Malo mar adat. Di Jogja adong ito na boru ni Amangtuana. Si Lasma goarna. Tinggal di Asrama putri, Pringgokusuman. Sahali lao ma hami mangan gudeg dohot ibotonai. Sidung mangan itoan i manggarar. Didok si Bonar, Amangtuana i adong Toko bukuna di Jalan Pangandaran, Semarang.
Burju jala bagak do itoan i songon bintang model si birong galot, Naomi Cample. Alai ala ni timbona sai maila maila do au. Ndang hea hulean roha. Ala jotjot pajumpang gabe hucaritohon ma sude namasa. Alai tintin tong do hupakke.
Tingki pakansi Natal diorahon si Bonar ma au tu Semarang. Modom di jabu ni ito Lasma. Tingki pajumpang dohot Amang i, las rohana. Malungun umbege hata Batak. Asing ni i arop rohana marhelahon halak hita. Alana parsonduk bolonna boru Jawa sian Purwokerto.
Ala ari Natal toko buku lam ribur. Gabe dohot ma au manjaga toko, ala lomo muse rohangku manjaha. Saminggu disi, mohop ma au. Hape sude ma lao tu tokko. Holan au ma disi dohot ito siampudan, si Laxmi. Sadari i ndang kuliah Ibana. Dituktuk ma pintu,"Bang dungo ma timbo mata ni ari", ninna huhut dibuka gorden.
"Songon na mohop huhilala," huhut dipeakkon tanganna dibohingku.
"Minum on," dilean pel dohot tes. Sai dijama ulukku. Dibuka ma tashu, dibuat singlet dohot kaos. Dibuka hancing ni bajuku.
"Unang pola, Au pe," ningku. Alai tong do dibukka, dilap dohot anduk na maraek. Mallobok taroktokku, ala saminggu dope hami di jabu i.
Dilean ma au sarapan, mangallang roti dohot tes manis. "Modom ma Abang," dibaen salimut. Imana pe modom di hambirangku. Ndang hupaboa on tu itona si Bonar.
Manghuling teleponhu, "Angkat jo Lax".
"Hallo siapa ya, bang Leo di kamar mandi"
"Ini adiknya, Jojor, ini siapa?"
"Ini Laxmi, hupaboa pe anon da," ninna ala hubaen tanda ndang olo au manghatai ala tok ulukku.
Sasintongna, diida ibana do adong tintin di jariku. Ndang huboto molo dihusiphon si Bonar naung ngali ngali hubunganhu dohot Paribanku. Huida sai asing do burju ni si Laxmi on tu au.Anggo timbona dos hami. Uli bontar songon Inangna nahinan. Anggo kakakna timbo jala birong galot songon Amangna.
Tingki mangan borngin disungkun Amang i,"Leo ma semester piga?"
"Ma skripsi Amang, paima ujian akhir nama dohot wisuda".
"Molo adong tingkimu ro ro ho mardalani tuson da!".
"Olo Amang," ningku dohot tongam songon halak Jawa.
Ndang barani au ro molo so dohot ito Lasma. Dirimpu annon naeng manjonohi si Laxmi.
Manogot i hutelpon ma si Jojor patoranghon na di Semarang au pakansi. "Ise i si Laxmi bang"
"Ito boru ni Amangtua ni dongangu si Bonar". Ndang huboto sungkun sungkun roha ni si Jojor.
Nunga tabo huhilala marsogot nai dohot ma au tu toko. Unang be padua dua dohot si Laxmi. Tung dia dia annon. Arian i sahalak borua mar jilbab biru muda manungkun ,"Mas Hukum Perdata di sebelah mana?:
"Disebelah sini. Ehh Masa Allah mbak Sri, kok..."
"Kok disini bang, kapan nikah, mana cincinnya" ninna ndang maradian sungkun sungkunna..
"Huida nangkin uli marjilbab biru muda, alai mok mok, ido ra tahe," narohangku.
"Apa kabar Longga kan nama tunangannya, mana cincinnya?," huhut ditiop jarikku.
Ro si Lasma dirimpu marsoal au dohot panuhor. "In Lasma pacarhu, ini Sri Setyaningsih," hupatandahon nasida. Satongkin ditinggalhon si Lasma hami nadua. Diingot hamlethu hian di Jogja.
"Dia jo nomor HPmu!"
"Telpon tu jabu ma bang," ninna dilean kartu nama parhalang uluna. Dung digarar buku di kasir, hupataru ma si Sri sahat tu parkir. Hututuphon pintu ni Kijang na. Parsaoran na uli ndang olo nihalupahon, nangpe ndang gabe sada.
"Bagak ate bang, boasa didok hamlet ni Abang?"
'Ha ha sorry da, na margait gait do. Asa diboto au pe dapot do na uli songon bintang".
Borngin i marnonang ma hami na opat dohot si Bonar dohot ibotona i. "Ai beha do pardongananmu dohot dokter muda i," ninna si Bonar.
"So huboto hagiot ni Amang, sai adat, adat dihatai, sogo rohangku. Ma mandao dao Ibana"
"Ai denggan do nidok ni Amangtua i, unang mago margam," ninna si Bonar.
"Ma dua halak donganku mundur ala so olo dibaen margana," ninna si Laxmi marungut ungut.
Sai sip au mambege si Bonar dohot si Laxmi ito nai. Hape ma leleng ito Laxmi mar hamlet dohot senior nai di Fakultas Kedokteran, Universitas Diponegoro, Semarang.
Saleleng di Semarang ndang hea au mardua dua dohot ito Lasma. Manang dohot ito Laxmi. Lao pe mardalani manang mangan tu kota tua dohot Simpang lima sae dohot do si Bonar. Jei hira itongku do hubaen. Ai ido ajar ni Damang, " Molo mangaranto ingkon luluan do natua tua, atik adong na porlu". Ido baen sai hormat au tu Amang i.
Dung wisuda borhat ma au tu Jakarta. Marujung ma parsingkolaan dohot transfer pas pasan. Mulai ma mandiori ngolu ngolu. Hutelpon ma tu Amang di Semarang naung di Jakarta au.Sian Amang i ma huboto ia si Lasma pe ma karejo di Jakarta. Di Apotek ni Abangna di Petojo, Jakarta Barat. Ala ito Lasma nunga Semester onom di Fakultas Farmasi di Jogja.
Dung huboto i pajumpang ma hami muse. Dohot ma au margurende Koor Naposo di Gareja Grogol. Ala diboto si Lasma na huetong ibotongku do, tangkas naso adong rohangku. Adong ma dongan sa koor na lomo rohana, karejo di Bank BUMN. Las roha ni Amang di Semarang. Ito Lasma saut tu halak hita. Pardonganon nami denggan do torus.
Andorang so dapot karejo huorom ndang lao mulak. Biar rohangku dijujui annon kawin. Maila iba ma S1 alai totop dibalanjoi. Alai untung ma sabulan do madapot karejo di Grup usaha konglomerat. Bahat Anak usahana. Dijalo ma au di Anak usaha bidang karet.
No comments:
Post a Comment