Tuesday, October 3, 2017

MANGGADIS KOPI (2)

 

Aut sugari denggan diulahon mananom kopi arabica ndang pola maol manggadis parbue ni kopi i tu Medan. Bahat disan panuhor, eksportir manang fabrik kopi.
Ndang songon najolo be sai holan tu sada tokke langganan i iba manggadis gota jala holan di Sibolga sajo, ndang hea sahat tu Medan. Hape gota nami gota asap kwalitet ekspor do na huasap hami sandiri.

Di zaman internet saonnari on panuhor parbue ni kopi bahat di Medan, adong 58 CV dht PT, ruas ni Assosiasi eksportir dan industri kopi Sumut. Ma hujaha goar ni CV, PT, alamat dohot nampunasa.
Boi ma pangidoon goar i tu Badan Pelaksana Daerah Asosiasi i. Tongos hamu ma surat email tu : bpdd_aeki_sumut@
yahooo.com

Ditawarhon ma kopi i tu piga piga panuhor di surat email i. Hulala tumigon ma diboan contoh parbue ni kopi i tu panuhor huhut masitandaan.
Molo maol manurat email, angka naposo i manurathon email, angka anak singkola SMA i. Diboto nasida do i.

Aso unang diangkali panuhor, andorang so taboan contoh, boi do ta test jolo kwalitet ni parbue ni kopi i tu Laboratorium di Medan. Ditongos ma contoh i tu:
1. Balai riset dan standarisasi industri jl.Singamangaraja no 24 Medan manang
2. UPT Balai pengujian sertifikasi mutu barang, Jl. STM No 17 kampung baru Medan, manang tu laboratorium naasing. Kopi na denggan kadar air 13% manang hurang sian i.
Najolo tingki kapala fabrik gota au di Rantau Prapat tu Laboratorium ni PPN do hutest hami. Asing ni i adong dope lab ni Sucofindo, Laboratorium ni pamarentah do on.

Diboan ma contoh ni parbue ni kopi i dohot hasil ni laboratorium.
Asa ummura ongkos ni transport molo boi ba piga piga halak ma manyewa mobil tu Medan 1 ton manang lobi parbue ni kopi i.

Di zaman internet on ndang pola maos tu Medan be lao, holan email email an pe. Barang pe boi ditongos lewat ekspedisi.
Borunghu pai 3 usaha ekspor miak ni pege do. Ulaonna manongos email tu panuhor langganan na leleng dohot mandiori panuhor na imbaru. Dungi manongos hasil laboratorium ni miak i, songon kwalitet na pinangido ni panuhor di luar.
Taringot tu ekspor hugurit pe muse.

Molo adong si sungkunon mu boi ma inbox manang massanger ate.

Boa hasian mardalani ma hita tu Medan

Guritan on husurathon do tong di bloghu sandiri www.jingga-senja.blogspot.com

MARUDUT

MANNGADIS KOPI (1)

 

Nunga jotjot hugurit taringot tu boniaga na adong di bona pasogit. Anggo mananom, mamiara, mangalompa, manggiling malo do ala nunga diulahon sian najolo, sian ompung, amang. Jei ndang pola bahat be sihataon taringot tusi.

Najotjot sunghun sunghun taringot tu modal na hurang. Anggo au mandok modal i ndang pola maol luluan molo tangkas do tudia, tu ise panggadisan di kota na jumonok, di Medan manang ekspor. Molo tangkas do ro do modal i tu hita, ditaruhonn. Jei panggadisan do pokok na, marketting manang pemasaran do kunci ni boniaga. Dangi ?.

Marboncir mai ala disungkun lae Surungan Purba dohot lae Marben Butarbutar, hudiori ma informasi tu tulang google.
Ia parbue kopi ni Sumatera Utara tung bahat do di ekspor, sataon manjonohi tu 70.000 ton manang 70 juta kg. Tarsonggot au manjaha. Molo sa kg Rp 60.000 etong hamu ma. Rp 4,2 trilyun sataon (2016)
Kopi on bahat do ditanom di huta, di bona pasogit. Na tarbarita di luat sileban, kopi Sidikkalang dohot kopi Mandailing.
Umbahat ma parbue kopi i digadis tu huta ni tulang Obama, 65%. Bangso na lomo roha tabo ni kopi sian bona pasogit ima Inggris, Jerman, Singapura, Tiongkok, Korea, Belgia, Arab, Australia, Taiwan, Korea.

Tabo ni kopi sian hutanta ima kopi Arabica. Anggo kopi Robusta ummura do.
Bangso na umbahat kopina ima Brazil dht Vietnam. Indonesia no 3.
Mulak muse tu panggadisan, marketting.
Di Medan adong 2 assosiasi kopi. 1.Assosiasi eksportir dan Industribkopi Indonesia. 2. Assosiasi Eksportir kopi Indonesia.
No 1 i alamat na di jl.
Kirana no.38 Medan telp 457.4350.
Tusi ma disungkun ise eksportir kopi di Medan ala asosiasi on dibina Pamarenta, Dinas Perindustrian dan Perdagangan propinsi. Molo boi disungkun jolo Dinas Perindustrian dan Perdagangan na jumonok di Kabupaten.

Asa unang adong calo langsung ma dijumpangi Katua manang Wakil Katua Assosiasi. Unang lewat pegawae staf. Molo dung pajumpang dht katua manang wakil dungi didok hatai ma dht staf, ba mabiar staf i parmeam mean hita.Didokma naeng mangalului bpk Saidul Aman (katua) manang wakil katua ima bpk Sulaiman, Winarmas, Michael Wijaya manang bpk Sofyan Wijaya. Angka pangurus on eksportir kopi do on.

Songon dia teknis negosiasi panggadisan tu Medan sahat tu ekspor, hugurit pe muse.
Beha hasian hamu angka ina i baen hamu ma koperasi kopi holan borua ruasna.

Marudut......

Wednesday, June 14, 2017

BALGA BONIAGA, GELLENG MODAL



Lam balga usaha lam balga modal manang lam balga utang. Ndang sala antong hata sisongoni.
Alai boa didok hamu, molo lam balga usaha alai lam gelleng modal. Anggo i dohonon mai na jago.

On ndang holan hata ni halak on, holan teory. Daong. On na sasintongna do carita on.
Adong do usaha restoran na balga mar puluh puluh lapo restoran na.
Tingki manuhor manuk sian peternakan na balga, digarar 1 minggu dung dijalo manuk i. Dung dilompa, digadis di lapo lapo i, ipe asa digarar tu peternakan. Jeijolo dipangan konsumen do, dungi pe manggarar tu peternakan manuk i. Astuan na ndang haruarsihumisik ni par lapo i. Marutang do parlapo tu peternakan manuk. Manuk na digadis i nunga jolo diseat, dipaias jolo di peternakan, disimpan ma di jabu peternakan i. Dung digora par lapo baru pe ditongos, jei ndang pola disimpan stock di jabu, gudang ni par lapo. Ndang pola porlu adong modal ni parlapo manuhor manuk ala hepeng ni konsumen do dipakke manggarar. Malo hian ate. On ma nadidok JUST IN TIME.

Boi do hita mar boniaga songoni ?. Isarana par hauma pege (jahe) manggadis pege manang haminjon, alai digarar saminggu dung ari onan. Tagadis ma muse to tokke, laos digarar tokke i ma cash rupani. Ongkos ni truk pe digarar dung sahat tu tokke di Medan, Siantar, Tebing isarana. Anggo songoni dang porlu hape tamba modal,manang tamba utang tu bank.

Adong sada nai taringot tu onan panggadison namasa nuaeng, ima SUPERMARKET pangganti ni Tokke China. Molo boi lao ma hita tu Supermarket di Medan manang di Jakarta, ta boan ma parbue ni suan suanan sian hitaan, ta bungkus antong uli binaen di plastik, olo do halaki manuhor sian hita ?. Molo olo do manuhor ma satahi dohot arga, on ma onan na masa saon nari, gabe boi inganan panggadisan tu tingki na mangihut. Unang be sai tusi, tu onan adui, tu tokke i, boasa ndang di buhai tu panggadisan modern, zaman si saonnari ? 

Dison holan "haporseaon"ni par hauma do, porsea do tu hita na ingkon ta garar pas ma saminggu dung ari onan ?. Ndang hea hita mangose padan saleleng on ? Haporseaon ma parjolo. Paduahon, ma adong piga piga tokke langganan di kota na balga na manjangkon suan suanan na taboan.

Songoni ma parputaran ni hepeng sian tokke tu par hauma, tu ongkos ni mobil. Molo songoni ndang pola porlu hape balga balga modal manang ingkon mar utang tu Bank. Kuncina 2 (dua) do ima : 1. Haporseaon 2. Tokke panggadisan (Marketting)

Tuesday, June 13, 2017

ANNEMER DALAN TOL TEBING TINGGI - PARAPAT




Bahat do halak hita na gabe annemer manang kontraktor ni dalan, singkola dohot proyek pamarenta na asing. Alai bahat do na rugi laos tutup usaha i ala ni bahat potongan ni hepeng i di pimpro, pimpinan proyek di dinas dinas. Ido umbahen na losok roha ni angka annemer mar proyek parpudion, mandele roha, iba do na marhoi hoi alai angka pimpro dohot bendahara do na mamora.
Saonnari ndang songoni be, ala Pimpinan dohot bendahara proyek ndang ditiop Dinas be, alai ditiop BUMN nama songon P.T.Hutama Karya, Cipta Karya, Nyndya Karya dohot BUMN na asing. Jadi ndang adong be potong memotong si songon na ujui. Ai Pamarenta nuaeng hatop do karejo pasidunghon dalan Tebing Tinggi - Pematang Siantar - Parapat 98,5 kilometer dohot anggaran Rp 8,28 trilyun. Balga hian anggaran ni dalan on, on ma tingkina hita mar proyek muse.


Molo adong dope CV manang PT na leleng ima dipakke mangido karejo proyek tu BUMN i ala naung leleng pengalaman do mangula proyek pamarenta najolo. Ima modal na umbalga, pengalaman mangula proyek. Molo porlu baen hamu CV manang P.T na imbaru.

Na umporlu saonari imataringot tu Alat berat.  Ingkon adong ma nean alat alat berat songon Buldozer, Escavator dht naasing ampunanta, unang be manyewa (ai timbo do ongkos sewa ni on).Tumigon ma ta sewa tu Leasing, haduan gabe ampunanta dung lunas.
Tingki manghatai, nego dohot BUMN didok ma na adong do alat berat piga piga unit boi mangkarejoi proyek dalan tol i, asal ma dapot kontrak. Molo dapot hitam diatas putih manang kontrak, tarsurat naeng leanon na proyek dalan tol, boanon ma kontrak i tu  panggadis, agen alat berat i. Agen ni alat berat i annon patuduhon usaha LEASING na olo mangalean utang sewa. Utang sewa do goarna ,astuan ala Leasing do nampunasa alat berat i sahat tu na lunas tagarar sewa na, isarana 3 manang 5 taon.Dung lunas marsoring ma ampuna alat i gabe ampunanta.

Molo boi unang ma pakke hamu perantara manang calo. Naeng ma pajumpang hamu tu kapala cabang BUMN i songoni dohot kapala agen panggadis alat berat. Unang  marbaga baga mangalean komisi tu pegawe ni BUMN manang tu pegawe ni agen panggadis alat berat i.. Ta pasomal ma ma mangula "professional" ai anak ni raja do hita.

Hudokkon pe songoni, ala naung hea dapot au utang leasing $ 1 juta andorang so krismon dope najolo. Hupajonjong ma P.T na imbaru, pensiun au sian parkarejoan. Ndang adong borg, holan kontrak do hupatuduhon. Ndang hubaga bagahon komisi manang silean lean, hatop do dilean utang i, holan sabulan do nunga haluar persetujuan ni Leasing..
Mambaen proposal tu leasing ndang pola maol i.angka administrasi doi. Naumporluu sibotoon, sadia ma balga ni kontrak proyek sian BUMN, sadia muse boi do manggarar angsuran ni utang leasing tiap bulan. Molo dung adong Alat berat i, torus nama dapotan proyek hita.

Songon na maol mura do jahaon ate. Ingkon ulahoonton do baru pe botoon didia do bangkol na jala disima nidiori songon dia dalan si dalanon. Ingkon loja do antong lao mar usaha. Molo so olo loja marsiajar, ba ndang boi maju hita.

Monday, June 12, 2017

MANGGADIS PARBUE NI HAUMA TU TOKKE DI MEDAN

                                                                    Pining

                                                                     Kentang

Nunga dao tahatai manggadis, ekspor tu Singapur. Huhut marsiajar boa proses ekspor, ta buhai ma manjalahi tokke na balga di Medan na somal mangekspor tu luar asing sian tokke panggadisanta nasomal saleleng on. Molo so tu Medan, boi do tu kota hombar balok songon Balige manang Siantar rupani.

Molo hujaha di internet adong piga piga goar ni tokke nasomal mangekspor. Malo malonta ma mandiori informasi dia arga na untimbo.
Asing sian mandiori di internet, adong do goar ni angka tokke exportir di Kementrian/Dinas Perdagangan di Kabupaten/Kotamadya dohot di Propinsi. Molo boi lao ma tu kantor i.

Tapasomal ma pajumpang dohot pangulu, kapala kantor, unang sai tu pegawe manang kapala bagian. Boasa pola ingkon tu uluan na?. Molo pe didok kapala i, hatai ma dht kapala bagian manang goar ni pegawe, pintor mabiiar do annon nasida aha do tahatai dohot kapala kantor i jei dang boi be hita dioto otoi nasida.

Unang be sai dioto otoi tokke nasomal di hutanta, taringot tu arga, ala ma dapot hita tokke na asing namangalean na ummarga. Molo holan tu tokke nasomal hita manggadis, olo do losok roha ni pangula di huta ala rugi do mangula ulaon.