DI ANTARA BINTANG #3

DI LANGIT ADONG BINTANG HASIAN

Mulak tu Jogja mulak tu kampus Gajah Mada dohot tu jabu kos. Ualu halak hami sa kos. Dua halak Batak, dua halak Semarang, sada halak Bangka, tolu borua sian Solo. Tolu boru Solo on kuliah di UII, Universitas Islam Indonesia. Molo borhat kuliah jot jot dohot do sada dongan nasida, Sri Setyaningsih.

Rampak marmotor do hami, ala kampushu di Bulaksumur holan tolu kilometer do sian kampus UII di Kabupaten Sleman. Sipata tingki mulak hualap ma si Sri. Hupataru ma tu Kauman, mardalan pat Ibana muse tu jabuna. Diorai do au pataruhon sahat tu jolo ni jabuna.

Kauman on huta ni pangulu ni Muslim do dison. Jonok tu Masjid Agung, sabolah Istana Sultan di Alun Alun Utara. Ndang sadia dao tu jabu kos nami di pudi ni Pasar Bringhardjo.
Asing ni rap marsiajar molo malam Minggu somal do hami mardalani rampak dohot dua kadet Akademi Angkatan Udara, hamlet ni mbak Sumiyati dohot mbak Endang.

Nang pe mardongan dohot boru Jawa, totop do ndang lupa tu Pariban. Dimula nai dua hali saminggu martelepon do au. Alai ndang hea si LonggaI parjolo martelepon. Sai holan au do. Molo ari Sabtu jotjot ndang aktif teleponna. Ndang hea manungkun andigan do pesta nami. Gariada si Jojor do ringgas martelepon. Tarlobi taringot tu soal soal test masuk GAMA. Ai serius do Ibana marrsiajar. So adong dope hamletna. Hape tong do uli songon bintang Jepang.
Heado huarbishon nean tu Inang, "Ai songon na ngali ngali do maen mi inang, boha doi?"
"Ah pamalo malohon do ho, baen naposo i dope i," ninna huhut mengkel.

Tingki baru mulak sian huta huorahon ma si Sri manonton. Ala bioskop Cinemax di lantai opat Mal Lippo na di Jalan Solo. Hutiop tangan na. Tarsonggot ibana hona tintin. Dibereng tanganhu. Tarsonggot Ibana.
"Naung kawin do Abang?"
"Ima naeng dohononku tu ho borngin on"

Parmisi ma Ibana tu kamar mandi. Hupaima saparopat jom so mar naro. Hu pajonok tu pintu ni WC ndang haruar. Bah masuk au. Gaor angka borua. Roma Security disonggahi au.
"Lihat pak yang jilbab biru muda?".
"Sudah keluar seperempat jam yang lalu naik taxi"

Hu telpon tolu hali ndang dialusi. Ujungna hu SMS ,"Ingkon ro au tu jabum saonnari". Ipe ndang diibalos. Ujungna lao ma au tu jabuna.
"Mau cari siapa?" dibollang au.
"Wassalam mualaikum ada Sri bu?".
"Belum pulang!" ninna huhut ditutuphon pintu di jolo ni igunghu.

Sa Minggu ndang tarida si Sri. Ipe muse mangkuling telpon. Huida nomor ni si Sri. Songgot rohangku.
"Hallo bang jam sada kosong au, boi do hita pajumpang?"
"Boi boi Sri paima ma disi da"

Lao ma hami tu Kaliurang, inganan wisata songon Brastagi. Hupillit hami hundul di topi ni kolam Tlogo putri. Ditoru ni bunga na hunik. Ala ni ngalina 900 meter diginjang ni laut, hubukka jakethu, hulean tu Ibana, huhancinghon.
Hucaritahon ma sude boasa gabe tunangan.
"Jei ndang kawin dope hape?," ninna huhut disandehon uluna di abarakku.
"Mabiar natua natua i unang dibuat tentara annon".

"Songonon do bang, Ayah Ibu nga diboto au mardongan dohot halak Sumatera. Kristen muse. Unang be pajumpang  hita ate. On ma parpudi". Dihaol ma au gomos dipanotnoti matakku apala jonok. Hupadenggan jilbab na.

"Salatta do, ma taboto lombang sai ta dalani".
"Boa molo mualaf Abang?"
Sai sip au. Dungi didok muse," Unang pola alusi saonnari, ndang na mura na mualaf i".

Pukul 4 potang tompu rimbus. Ala adong pasir tarsulandit ma Vespa nami. Danggur ma hami tu toru ni dalan. Maribak bajukku. Si Sri hansit patna ndang boi mardalan. Maruntung burju par huta i diboan hami tu Puskesmas. Vespa boi dope mardalan boi hubonceng Ibana sahat tu jabuna.

Dihaol ma au lao nangkok tu jabuna. Hailaon bolon do di huta i masihaolan naso Muhrim.
"Ma hua ho Sri mahua ho hasian. Tangan mi," ninna inangna ditombishon tanganhu.
"Unang huida be bohim," ninna bapakna huhut disampathon jakket blue jeanhu tu tano. "Lao ho," ninna muse diangkat tanganna tu ginjang.

Hucaritahon ma on tu dongan sa kos mbak Endang dohot mbak Sumiyati. Ditelepon nasida ma, "Gimana keadaannya Sri, bang Leo cerita. Kami mau nengok?"
"Sudah diurut, sudah bisa jalan dikit. Bang Leo jangan ikut ya, Ayah lagi marah".

Sampulu ari nai pe hami pajumpang di Mall Jogja. Huhut minum Coca Cola, burger dohot kentang goreng hudok ma, "Nunga naeng dua taon hita mar dongan. Boa olo do ho hita saut?"
"He he ise naeng kawin tu Abang, unang GR," GR Gede Rumongso manang sombong.
"Molo mualaf olo do ho mangalua, kawin lari"?
"He ise naeng kawin tu Abang, mangalua muse, diseat ma annon au," ninna mengkel na gogoan. Bahat mamereng hami. Ditutup simakudapnai dohot jilbab na biru muda i.
Didok muse, "Tintin i tongosonmu mulak?".
"Olo ba ho ma manogoshon," ningku huhut mengkel.
"Anggo au mandok ingkon sohot do Abang tu Paribanmi, cintami sian daganak".  Ima pingkiran ni sada Mahasiswi, narohangku dibagasan.

Bulan marganti bulan hubungan dohot si Longga lam ngali ngali. Molo martelepon au ndang lupa hudok, "Pasahat tabe tu pelatih Paskibara i da!"
"Ah Abang," holan ido alusna.
Hea do hu sungkun,"Tudia do ho kuliah?"
"Tu Medan bang, si Jojor ma tu Jogja, Ibana do ummalo"
"Asa jonok do ho tu calon Letnan i di Secapa kan?"

Tingki Hu sungkun si Jojor, "Jot jot dope si Poltak tu Simaninggir?".
"Ndang hea be bang, alai Inang jot jot pasingothon kakak molo tarlambat mulak, naung tunangan Ibana".
Botul do nidok ni  umpasa Jawa: Witing tresno jalaran soko kulino. (Tubu holong molo pajono jonok).

Arsak ni rohangkon  hucaritahon jo tu mbak Sri. Roma ibana tu kos nami naeng marsiajar dohot donganna. Huorahon ma mangan gudeg di lage lage di Malioboro. Roma telepon Ibu ni mbak Sri tu kos nami, "Mbak Sum HP Sri kok ga bisa dihubungi, bisa bicara sebentar"
"Maaf bu mbak Sri lagi makan di Malioboro," ninna sasintongna. Ndang sadia leleng roma Abang ni mbak Sri mandiori tu Malioboro.

"Sri dipanggil Ibu sekarang"
Ndang boi mandok agia aha pintor dohot ma Ibana mulak. Ala margabus naeng marsiajar.Hape tukang lukis jalanan ndang sidung dope manggambar bohi ni si Sri. Gabe huboan mai tu jabu. Ala ni pargabusan ni si Sri ndang diloas be ro tu jabu nami. Ndang olo be rap mar motor tu kampus. Nomor HP na pe ma diganti. Molo ro au tu kampus UII ma mandao dao Ibana.

Ma leleng ndang pajumpang be dohot si Sri. Tingki ro udan haba haba, ronggur pe tompu. Roma pataru undangan mar pita na ijo. Goar ni Sri Setyaningsih tarsurat disi. Undangan perkawinan.
Rap ma hami sa kos tu undangan i. "Beta ma tajalang," ninna mbak Endang. Tarsonggot au ala marangan angan. Marbaris ma hami manjalang pengantin. Tingki hujalang si Sri huida manetek iluna. Ma naeng hulap nean, alai sai diserbeng Inang na.

Sinden, parende boru  Jawa mangendehon "Ing Tawang Ono Lintang Cah ayu" ( Di langit ada Bintang anak manis).