DI HALIANGI BINTANG #2

MARTUNANGAN

Ala nanaeng martinju dohot si Poltak gabe losok rohangku paihut ihut roha ni Inang.  Alai ndang barani mandok. So hansit rohana ni Inang annon.
Huboto do na marsangkap do Inang dohot Tulang asa saut au mar pariban. Jala asa lam dao si Longga tu na marbaju ijo i.

Ari Senin arian hu SMS si Longga, “Longga dung singkola hu jemput da”. Ndang dialusi, na marsiajar do ra. Lao ma au tu singkola nai. Dungi haruar si Longga mar pahean Olah raga. Didapothon ma au, "Sadarion latihan Paskibara hami, marsogot ma roho da",

Potang i anggina si Jojor telpon , "Bapak muruk muruk bang ala leleng kakak mulak didok ma, "Dongan mi sersan do pangkatna, hape si Leo dua taon nai ma naeng S1".
“Ibana pe naeng singkoka Secapa, Sekokah Calon Perwira, dung lulus gabe Letnan," ninna kakak mangalusi.
“Lok ma songoni Jor, dia lomo ni rohana"
”Ah, Abang nga adong ra hamletmu boru Jawa di Yogja”.

Ari Sabtu nai ro dope au tu Simaninggir. Jala naeng modom disi songon hasomalon ujui. Ala sihol dope roha tu Tulang na burju i. Huhut marminggu sogot nai disi. Mandapothon batu lubang ro ma motor hatop hian. Di lewati ma motorhu, dikalekson muse. Panas hian pinggolhu hulala. Ndang olo talu, hu gas motorhu mangalele namar jekket ijo i. Sian kilometer lima sahat tu kilometer 7 hami masi joloan. Hape dalan marbelok belok songon letter S. Sai hira lomba na di filem filem i. Marbelok tu hambirang, marbelok tu siamun huhut menggol enggol parhundul nami. Gas pe pol. Alai ndang taralo au, ai nga somal ibana.

Alai pas di pengkolan patah kilometer ualu, tarsonggot tondingku. Huida tarsulandit motorna. Habang ma ibana sampat  tu lombang. Hupapeak motorhu.  Ma sangkot ibana di bona ni hau na balga tu toru uluna. Amagoi Amang. Anggo motorna ndang haidaan be. Humahitir au martelepon, "Longga ma... ma dabu tu lombang !"
"Tenang bang, aha na masa...tenang jo"
"Poltak madabu, pahatop jo di pengkolan kilometer ualu da"

Hu ambat ma Bus Sibolga – Medan mangido tolong manarik si Poltak. Ndang sadia leleng roma si Longga mamboan mobil palakka. Huboan hami ma tu RSU Sibolga. Dungi di telpon si Longga ma muse tu Kodim  asa nasida mamereng mereng.

Borngini saut do au modom di jabu ni Tulang. “Baen jo indahan ni Abangmu Longga," ninna nantulang. ”Kan disi do si Jojor”, ninna si Longga, ra asa lam jonok tu au.
Tingki marnonang di ruang makan tonga tonga, digoreng Nantulang ma  pisang goreng. Laos dibaen si Jojor ma sagalas kopi. "Ai holan sagalas do dibaen ho, dia di au?," ninna si Longga.
"Idama ni ma adong tanda tanda unang be sai dongani i," ninna Tulang alai ndang didok goar ni si tentara i. Sai murhing bohi ni si Longga.

Tingki tabo marcarita songgot disungkun Tulang ,"Molo so tammat dope boi do sohot Leo?"
Tarsonggot tu sungkun sungkun i. "Ohh boi boi Tulang," ningku ala diguit si Longga  pathu di toru ni meja. So huantusi aha maksud ni Tulang. Borngin i si Longga sai sip. Sai tu Rumah Sakit do dipingkiri huhilala. Ujungna masuk ma ibana tu kamar.

"Bang molo lulus au naeng kuliah tu Jogja, urupi da bang," ninna si Jojor.
"Ma diboto Tulang Nantulang?"
"Nungga, las roha nasida binsan disi Abang".
"Pasti pasti huurupi, ringgas maho marsiajar da, jurusan aha?"
"Akuntansi".

Haruar Gareja hupahatop hami mangan ala dijou inang si Longga tu Sibolga. Hami natolu naek jip ni Tulang. Si Jojor di pudi. Sasahali huserbeng do si Jojor sian spion ala marende ende lagu cinta ibana. Asa unang marsak kakak na i. Sahat di jabu di Angin nauli, si Longga masuk tu bagasan. “Horas namboru," huhut diumma.

“Ujung ni bulan mulak nama ibana tu Yogja, boado pangkataionmu?”.
“Amang mandok molo dung lulus au asa rap dohot Abang tu Yogja,”. Dungi diuduti, ”Hudok jolo dung wisuda pe Abang, unang lola kuliahna”.
"Aupe songoni do hupikkiri," ninna Inang. Huhut diuduti, "Boa molo tunangan jo hamu.

Sai sip si Longga, leleng dipikkiri.  "Boado hasian?". Tarsonggot si Longga.
"Huhatai pe tu Amang Inang Namboru".
“Olo hasian, alai unang palelengku da!".

Andorang so mulak, bezook hami tu Rumah Sakit. Nangpe pakke perban ulu dohot pat ni si Poltak, ndang pola sogo rohana pajumpang dohot au. Gariada mandok mauliate ala naung huurupi ibana. Alana ala ni haposoon do, ndang binoto jea. Holan naeng habang, ise humatop sahat tu bintang Simaninggir i.

Marsogot nai, ari Sinen, Amang Inang mulak sian martiga tiga gota di pasar Sitahuis, dua pulu tolu kilometer daona. Dungi maradian di jabu ni Tulang. Potang pe asa sahat tu jabu. Inang marende ende didokma, si Longga ma mangundukkon olo martunangan . Arina pe ma ditodo, ari Sabtu, 30 Januari.

Piga ari dungi hualap ma ibana sian singkola. Hundul ma hami di topi ni laut jonok tu pelabuhan. Suara ni galumbang ndang maradian tombom tu batu di pinggir ni laut. Tarsongoni ma ra roha ni si Longga.
"Songon na lungun roham Iban"
"Na masuk angin do ra bang, ninna huhut diparrorahon galumbang na lam timbo di potang ni ari.
Huhilala borat do parungkilonna. Pargaulanna dohot si Tumpak. Borat do dipikkiri mangoloi hata ni Tulang. Manang mangihut lomo ni rohana tu tentara na togos i. Dipikkiri muse, Tulang marsahit jantung. So tung dia dia annon.

Dapot ma tingki  martunangan. Holan saotik do na ro ala so adat. Angka naposo dongan ni si Longga, Tulang namarhaha maranggi. Dohot uda namboru na tinggal di SibogaTingki mandok hata  tarbege ma suara ni motor manang na piga i. Mulak ulak gasa gasa on di jolo ni jabu nami di Jl.Dolok Martimbang. Dibaen ma gasna gogo gogo, adong na mar klekson. Hubege angka dongan ni si Poltak do na roi. Ndang pola sanga hujou hami polisi ala ndang sadia leleng lao ma halahi.

Ari Sinen aupe habang ma tu Jogja dohot tintin di jari ni tangan. Si Longga dohot si Jojor  dohot do tu Bandara F.L.Tobing, Sibolga. Huhaol ma si Longga , Inang dohot Ibotongku. Manaek tu tangga ni pesawat, hubereng tu pudi, hudada nasida.
Ban ni pesawat mardalan lambat, hudulo sian jendela, ujungna mago sian mata. Alai ndang mago sian roha.