DI HALIANGI BINTANG #1

HOLONG MAR PARIBAN

Tung las roha umbege suara ni pramugari ni Garuda, "Beberapa saat lagi kita akan mendarat di bandara FL Tobing, Sibolga". Sajom nai ummaon ma Damang dainang dohot angka iboto. Nunga tolu taon ndang mulak tu huta. Masihol tabo ni dekke dohot suara ni galumbang di topi laut Teluk Tapian Nauli.

Sahat di jabu disungkun Amang ma "Boha do singkolam ?".

"Nunga Sarjana muda Amang, nang pe sian huta huta boi do huihuthon"

" Ma adong hamletmu ma dua pulu taon ho"

"Ndang adong dope, maol do mangalului halak hita di Jogja, anggo boru Jawa bahat," ningku huhut mengkel.

"Tenang maho namura mai," ninna Inang muse. Huroha ma adong sangkap nasida naso huboto. 
"Marsogot lao hita tu huta ni Tulangmu di Simaninggir," ninna Inang huhut manerbeng Amang dohot simangkudap na rara ala ni napuran.

"Kan, paribanmu dua disi songon bintang," ninna muse huhut mengkel suping.

" Sai hira zaman Siti Nurbaya." 

"Ho nean, bereng majo ai nunga kalas tolu dohot kalas dua SMA nuaeng.Tingki dakdanak dope hamu nunga sai ni todo todohon." Birsak aek ni napuran na.
"Molo adong Pariban unang pola lului boru ni halak."

Jabu ni Tulang sampulu kilometer di dolok. Marbelik belok do dalan tusi songon ulok. Idaon ma annon batu lubang binaen ni Bolanda. Tung uli idaon mangida laut na balau di toru an. Ala gelleng ni dalan ingkon maradian do mobil na tuat mangalean dalan tu na nangkok. Asa boi lewat.

Hira hira pukul sampulu borhat ma hami natolu dohot Damang Dainang.Ditingki sahat marhobas ma nantulang dohot paribanhi si Longga dohot Nantulang. Dipanggang ma tong dekke haomoanku. Dung sae mangan dipasombu ma hami na dua di meja makan tonga tonga. Dibagasan rohangku, "Lam uli, bontar, obuk na ganjang, mata na pe tio songon bintang."

"Nga kalas piga ho Iban"

"Kalas tolu bang."

"Taon naro singkola di Jogja ma hita da ?"

"Pandok ni Amang ma"

"Ma adong hamletmu?"

"Ndang dope," ninna maila ila.

"Huk huk huk," batuk batuk si Jojor anggina i, paingothon naung adong hamlet ni kakak nai. Huhut didok,"Diingot ho dope kak lomo roha ni Abang i maniop tanganmu najollo?" Di danggur si Longga angginai dohot hassang.

Di pardalanan mulak tu Siboga, disungkun inang, "Boado?"

"Ai aha do boa?"

"Lomo do roham?"

"Atik naung adong do halletna."

"Ah ho nean, molo lomo roham asa huhatai hami tu Tulang mu"

"Mandok boha?"

"Ba martunangan hamu," ninna Amang gogo engkel na.

"Ha ha ha," holan ima alushu.

Malam Minggu nai lao ma au muse tu dolok sahalakku, "Longga ro Abangmu, ninna Nantulang. Dung marcarito ganjang dohot Tulang, Nantulang dohot si Jojor dungi parmisi ma au dohot si Longga. Lao ma hami 2 kilometer tu toruan. Hundul di sopo sopo. Ma potang ari, ima uli ni angka lampu ni parau dao di laut songon bintang. Tarida ma pulo Mursala dohot pulo Poncan di Teluk i. Ima na manahan ndang hona Tsunami Siboga songon pulo Nias di sihadaoan

"Ma adong hamletmu?"

" Ba sai holan i disungkun Abang, boa huroha,"

"Ninna inang naeng martunangan hita, molo olo ho"

"Abang olo do huroha?"  Obukna na ganjang i diombus alogo hona bohingku, huncuss.

" Ai beha do par donganonmu dohot  na mar baju ijo i?".

"Oh ai guru Paskibara nami doi. Tingki pingsan au ibana ma pataruhon mulak. Sian ise diboto Abang?"

"Sian alogo na mamolus, ise goarna?"

Rrrrr...tompu maradian sada motor. Naposo na jogi mar jeket na ijo. Si Longga na hundul di lambungku jonjong. Tarsonggot. "Masitandaan hamu. Bang Leo, Bang Poltak," huhut masijalangan.

"Mahua ho tuson, so diboto ho do uhum." 

"Aha didok ho?" Ma diangkat tangan siamun na maniop bajuku.

"Ndang diboto ho uhum, holan na mangeroncohi halak"

"Stop stop, ndang dakdanak be hamu da," ninna si Longga.

"Abang mulak ma tu Siboga, si Poltak pe pataruhon au".

"Ndaong, au mamboan, au pataruhon mulak. Palao ma i !"

Rrrr... pintor lao ma si Poltak tuat tu Siboga. Di gas motorna martimus ban nai.