PAJUMPA MUSE ....DUNG MARPAHOMPU

            


              Adong dope jabu na di Sibolga saonari (foto)

"NDANG DITANDA HO AU?", ima sunggkun sungkun na naparjolo tingki hundul Ibana di hambirangku. "Ise do tahe, paima jo huingot", ningku mangalusi. Pindah do imana hundul lam pajonok tu au, dung didok namarsahit i :"On Ompung Situmeang, par Kelapa Gading, par BRI" ninna.

                                               Boasa ingkon pajumpang by Joy Tobing

Huroha sahat do barita i tu ibana, ia au karejo di BRI do. "Hu par ate atehon, botul Ibana do i, narohangku" , ninna Ibana. "Boru Tambunan, Nyonya Simanjuntak" ninna huhut dilehon tanganna masijalangan. Songgot do rohangku, 40 tahun dang pajumpang dohot Lumongga Tambunan, dongan saparmeaman di taon 1962 nasalpu. Tung so boi be huingot rupana ala nunga rap matua, nunga rap marpahompu, jala antar timbo do parbadanonna.

Na lao do ahu tu jabu ni dongan sabutuha ala naeng sohot, marpesta ni siampudan nami, Pahala Situmeang dohot Shinta Dewi. Alai dang adong dijabu, toho marsahit pahompu boru i, Situmeang (nomor 15). di Rumah Sakit UKI, Cawang, Jakarta Timur. Ditingki i, 3 dongan nasida sahuria ro mamereng pahompu boru i, ima boru Tambunan dongan saparmeaman, boru Panjaitan, dongan hombar balok nami najolo tingki di Atambua, Timor.

Ditingki ujung ni parsingkolaon, kalas 3 SMEAN mardongan dongan do au dohot borua namarsiajar namarbaju, kalas 3 SMPN di Padangsidempuan ala pajonok jonok jabunami. Holan mardongan dongan songoni do. Ai tu Gareja pe dang hea rappak mardalan. Ditingki i holan masi bereng berengan pe, nunga adong roha lao mardongan dongan.
                                  Selamat datang tu Padangsidempuan

Ditingki lao singkola, mardalan manang mar kareta angin, sai pinalu do lonceng ni kareta on, mata sai mamereng tu tuhambirang,  ra di emper i ibana hundul. Ba engkel suping nai nunga sonang roha.   Balga ni jabu i patandahon na marsinadongan do nampunasa, songon jabu namartingkat dua, sian batu, di jolo ni jabu  ni marga Tambunan i, sada jabu ni namora di Kampung Marancar, kota Padang Sidempuan.

Sabotulna holan masiberengan do hami nean ditingki i, dang hea dope lao manonton manang mardalani padua dua songon somalna naung marhamlet (marhallet?).. Alai ditingki i nunga ma sisurat surat an hami. Lupa do au ise do parjolo manongos surat, ai nunga leleng, ditaon 1962 do anggo carita on. Huingot dope, dibagasan surat na adong do hata  songonon::"Ai botuldo hamu lao piknik dohot si Nuraini?", ninna songon na cemburu tu dongan sasingkolana, margoar Nuraini, boru ni haji, ala hea hami piknik markareta, di udan udan, dibonceng di jolo. ala so adong boncengan di pudi. Huboto sian i na adong do rohana tu au.

Dang sadia leleng dope hami mardongan dongan, sirang songoni do  hami , ndang pola pinaboa nanaeng borhat  mangaranto tunadao, tu Jawa, singkola tu Yogjakarta di Fakultas Ekonomi GAMA, Ibana  lao ma tu Sikkola Bidan di Rumah Sakit Pematang Siantar, Sumatera Utara. Alai mulai sian  i, jotjot  ma hami masi surat suratan.Jala tung tangkas do binoto songon dia rohana tu au.

Dung habis G30S/PKI, hira hira taon 1966 nunga masihol roha tu Damang/Dainang ala nunga leleng dang pajumpang, tarlobi au anak sasada baoa, mulak mau au tu huta hagodangan di Sibolga. Ditingki i  husangahon do lao tu Siantar, pajumpang dohot si boru adi.
                                  Sibolga na uli

 Tingki hudokkon tu Amang naeng tu Siantar au didok do :"Unang pola lao ho tusi" ninna do mangorai,  jala dipangkataion nami jotjotdo dipaingot songon on :"Burju burju ma ho singkola, anggo namarbaju mura mai", ninna. Tingki i nunga Sarjana muda au. Alaitotop do hulangkahon lomo ni rohangku, mar bis ma au tu Siantar.

Manang na piga ari disi, toho mai diujung ni taon, rap borhat ma hami  tu Sibolga, jala digogohon rohana do martangiang borngin pargantian taon dijabu nami, jala modom di jabu do Ibana, ala adong dua Ibotongku di jabu. Sabotulna borat do di rohana borngin i, mulak tu jabu ni natorasna manang di jabu nami., siala Ibana panggoaran. Tontu sungkun sungkun ma roha ni natorasna.

Dung torang ari, hatop do hami lao tu stasiun bus, borhat tu hutana di Padangsidempuan, 88 km daona tu Selatan. Dung sahat tu jabuna masijalangan ma hami :"Selamat taon baru Amang", ningku alai tung maila do rohangku. Hubereng tu siamun, tumatangis do Ibana mangkaol Inang natumubuhonsa.
 Jala di jabu ima au modom manang na piga ari. Jala ima ari parjolo hudege tu bagas nasida. Andorang mardongan dongan, holan di emper emper i do hami hundul hundul.

Marsepedamotor ma hami mardalani di kota i huhut martaon baru tu jabu ni tondongna. Di jabu ni tulangna disungkun ma au :"Boi do sohot nang pe mahasiswa hamu", ninna. Tarsonggot au mambege sungkun sungkun i, hohom au satongkin, sian ias ni rohangku hualusi langet huhut maila :"Boi do tulang", ningku, nang pe dibagasan rohangku dang huantusi lapatan ni hatangki.

Jala di Sidempuan pe adong do Amangudaku kandung dohot Ompungku boru, tinggal di Kampunglosung, jala sanga do au tinggal disi manang sadia leleng. Jala ro do hami martambaru tu jabu ni Amanguda on.

Alai holan hata sungkun sungkun do, ndang adong ujungna, manang pasahat hata nasida tu natorashu. Bere naipe dang hea pola dihata hatai manang disungkun disuratna. Ba lupa dihalupahon mai. Ditingki i torop do mahasiswa naung berkeluarga, mardakdanak, ima na dapot bea siswa, lao gabe guru muse.

Saleleng na on ndang huboto tangkas tu ise Ibana sohot, alai taringot tu au, dapot ibana do barita sian Ompung dohot Ibotongku na tinggal di Padangsidimpuan jala nunga pindah tu Jakarta. Diboto do naung sohot au tu boru Pasaribu jala karejo di Bank BRI.

Ima pardalanan ni angka ngolu, ala ni angka tingki, inganan na dao, pardonganan ,jala parkarejoan, ujungna dung habis singkola, karejo ma au di Jambi, pajumpang dohot boru Pasaribu, nunga gabe maranak marboru dohot marpahompu. Ibana me nunga gabe tu marga Simanuntak gabe maranak, marboru, marpahompu.
Sude dalan dalan ni ngolu nunga disurathon Tuhanta tu hita anup ganup jolma.