BORU SOTUDOSAN

Turi - turian marga Siahaan Hinalang dohot Situmeang.

Laoma doli - doli Jerman marburu tu tombak longo - longo. Ma sai disuru mangoli laos so olo do. Holan namarburu do ulaonna.

Ia parburu tinggil do pinggolna. Jala tiur simalolongna. Diboto do sadihari, dingkan dia dalan ni aili.
Alai sahalion, tarsonggot simalolongna. Hira namarnipi marnida sada namarbaju di liang (gua).

Jolo dititip sanggar asa binaen huru - huruan.
Jolo sinungukun marga asa binoto partuturan.

 "Aha do margamu ito, didia hutamu?" Sai sip ndang olo paboahon.

Mengkel suping namarbaju i, akabukbak Siahaan i marnida hinaulina.

"Hupataru pe ito mulak tu hutamu."

"Mabiar do au mulak ito."Lambok pandokna,
maila ila borua i, lam  gor gor rohana ni Siahaan i.

Dicaritohon ma. Ia ibana nadiboan amangna do marsoban tu tombak i. Ndang sian parbinotoannya ditadingkon sasadasa.
So diboto dalan mulak ala tung daona huta nasida.

"Ditadingkon, dibolokkon au ala sogoni rohana tu au dohot ibotongku nalinduat.(kembar).
Sian na gelleng sai sahata, sa panghilalaan jala saparmeamon do hami. Gariada sahat tu namagodang tahe. Martapian pe hami sai rap.

Hailaan bolon do parange sisongoni. Ido umbaen dipadao namariboto i. Ibana tu tombak di luat Hinalang. Ibotona tu Parlilitan, Humbang hasundutan.

"Anggo songoni tu hutanami tu Hinalang ma ito dohot."

Molo olo ito na uli on mangoli nama au. Ai maos didok iba mangoli. Ima na gor gor dibagasan roha ni Siahaan Hinalang i.

Potang i borhat ma nasida. Ma golap sahat. Ditabunihon ma itoan i di bilut di para para mar piga  minggu, ndang dipaboa tu natorasna.

Ndang tartaon ibana be taroktokna, didokma tu natorasna. "Mangoli nama au Among Inong ."

Tarsonggot nasida. Ala saleleng on sai dijujui mangoli laos so olo.

"Tu ise ho amang mangoli?"

"Adong inong boru marga Sotudosan, pajumpang hami di tombak."

Dipalu horong Siahaan Hinalang ma ogung manomu nomu boru Sotudosan i. Mijurma sian bilut para para. Longangma natorop i marnida uli ni boru ni Mula jadi nabolon i..

Jempek ni carito, sorang ma dakdanak dinasida. Lam balgama dakdanak i. Sada tingki disungkun ma."Inong didia do huta ni tulangku."

Dimulanai ndang olo boru Sotudosan i mandok marga dohot hutana.
Ala hansit rohana dibolokkon, ditinggalhon ibana di tombak so ima daona sian hutana di Sipoholon.

Alai ala na sai dielek elek, dipaboama margana, Situmeang sian Sipoholon.
Ima pahompu ni ompu Situmeang Rajalalo. Buhabaju ni Tuan Parsatti.

Manghatai ma Siahaan on dohot sisolhot na jonok. Satolop manasida paboahon tu natoras ni boru tudosan.

Ndang sadia leleng laoma horong ni Siahaan Hinalang, tu Sipoholon marbongin di dalan ala bahat horbo sinamotna. Ido gabe litok dibaen aek Sigeaon dibaen horbo i.

Ala hurang manjakkon do haha doli ni tuan Parsatti. Ujungna sude ma horong Situmeang udur manjakkon haroro ni horong Siahaan Hinalang.

Ala niido sai sangap do marga Siahaan Hinalang on tu sude marga Situmeang. Sahat tu dakdanak pe.

Nang pe torsa on nunga mansai leleng, ratusan, ribuan taon, sahat tu sadarion sai dijou tulang do tu Situmeang. Jala diorai natua tua do unang mangoli tu boru Siahaan sian Hinalang. Anggo marga Siahaan naasing boi do.

Ianggo iboto ni boru Sotudosan dipadao do tu huta Parlilitan di Humbang hasudutan.Ndang pajumpang be na linduat i.

Angka natua tua ditonahon do tu anakna unang mangoli tu boru Siahaan Hinalang. Ala ibotona doi, tubu ni namboru.

Jei molo pajumpang Siahaan Hinalang sai didok nasida, Anggo ndang boru Situmeang  ndang adong hami.

Ndang salah hape boru Situmeang mansai uli uli. Parate atehon hamuma.

#DISCLAIMER
Turi turian on holan napinapungu - pungu sian komen di grup Pomparan Situmeang.
Ise naumbotosa asa dipadenggan manang ditambai be.