Saturday, January 28, 2017

MOLO HOLONG ROHA




Ingkon pake computer nama antong pembukuan saonnari, dungi unang paporseahu taringot tu parhepengon, hakim mahkamah konsitusi pe tong dosilop mata mamereng.
Jotjot do ama ni Monang margait gait dohot 4 namarbaju, parkarejo di sada kantor gareja (santabi, dang hkbp da !). Alai adong sada namarbaju tar bagak, rara bibirna, sipit matana, mandao dao.
Dang tama antong sai margait gait dohot namarbaju da. Molo diboto nai Monang, oloma mardangguran angka pinggan annon.
Disi dipillit sintua ama ni Monang, dihaporseai do imana maniop puro puro, parhepengan ni huria. Disi gabe sintua imana hatop do diganti sistim tata buku Bolanda, sian manual (tulis tangan)  gabe computer.
Dung sude dipamasuk di computer, songon na adong na geno paretongan, adong ra namago hepeng.
Alai di laporan natarsurat binaen ni kasir on, sudedo tangkas, dang adong nahurang. Hurang 8 nolna daba. Ualu nolna ???. Ai nabea namaon, ninna roha ni ama Monang.
Kasir on jotjot dang masuk kantor, sadari masuk, 2 absen, marsahit ma alasanna. Oloma saminggu dang masuk, gurgarma parhepengon. Lao ma amang Monang dohot 2 sintua borua tu jabuna, mansai dao hutana. Dituktuki dang ra dibuka pintu, dang binoto disi do imana manang na daong. Hutinggalhon hami ma surat tu ketua RT dijolo ni jabuna.

“Molo so masuk ho karejo sahat tu ari on, paradiantononton namI ma ho”.
 Ima isi ni surat tu parkarejo di sada huria (santabi, dang hkbp da). Dipaima ma tingkina, tong dang ro masuk. Ujungna katua ni sintua disi mamparadianton parkarejoi , hape nunga lobi 15 taon imana karejo disi gabe kasir. Adongdo 10 halak lobi pegawai kantor ni huriai dohot 125 sintua, ala balga do huriai antong, ribuan ruasna..
Dibuka amang Monang ma Brandkast, diberengma, holan tolu lembar ma deposito. Hape dilaporanna adong 5 lembar. Disungkun ma tu Bank, hape naung dihepengkon kasiri do, sintua bendahara do manekken (ala porsea). Sintua naparjolo, so hea dibuka brandkas, ala porsea.
Porsea antong sintuai tu imana ai nunga 15 taon karejo. Dungi laporanna be sun dengganna, rade do molo sadihari dipaido sintua. Dungi molo mangido hepeng di acara nabalga songon natal dohot paska, dang hea ditulak, totop do adong hepeng.
Dung dipaboa ama ni Monang di rapat sintua, gaor ma sude, dang porsea nasida mago nasai godang, gabe dimuruhi ma ama ni Monang didok :”Unang pamalo malohon sintua naimbaru”, ninna.. Boasa dimuruhi diloloan, dirapot ni sintua ama ni si Monang ?, ala jolma sihaporseaon do itoani.

Dang sadia leleng dibalos kasir ma surati, balosna dang tu sintua alai tu sada pandita. Disuratnai dihantindangkonma hasalaanna, jala ias do rohana ahe po uhum na jalonna ma.
Dipatorangma disurati, nadipinjamhon itoani do hepeng tung bansai bahat, 8 nol. Dipapinjamhon tu halletna, halak minang, mobil na roa roa dilean gabe borgna. Larima halletna, halak minangi, dang diboto didia jabuna, dang diboto didia hutana.

Songoni do dinadeba anggo naung holong roha, aha pe dipangido laos dilean, dang tingkos be mamikkiri dia nasuman.

Post a Comment